Comissão da Função Pública

Ajentes Administrasaun Públika resén rekrutadus nain 49 kompostu husi grau C – 16, grau D – 16, grau E – 17, feto nain 20 no mane 29 asina termu aseitasaun kontratu husi Prezidente Autoridade Munisípiu Covalima no Komisaun Funsaun Públika, iha Covalima iha segunda-feira, (18/08/2025).

Iha serimónia ne’e Prezidente Autoridade munisípiu Covalima, Miguel Armada Cardoso hateten, eventu ne’e primeira vez realiza hetan funsionáriu nain 49 liu husi konkursu públiku ne’ebé kompete husi ema barak maibé admite ema nain 49 tuir duni méritu. Termu aseitasaun no posse ne’e husu ba emposadu sira atu aproveita oportunidade ida ho didiak, dedika aan iha área administrasaun públika, kumpri dever no obrigasaun, hala’o prestasaun servisu ho onestidade, transparensia no inparsialidade. Banati tuir ita nia erois sira, sai exemplar hodi serví povu no nasaun hanesan uluk sira luta ba libertasaun nasionál, laiha regalias ruma maibé oferese aan hatan mate no terus oi-oin iha tinan barak nia laran maibé konsege atinji objetivu ukun rasik aan, ohin loron ita nia rain liberta ona, imi kontinua luta hodi halo dezenvolvimentu atu priense kriterius ne’ebé uluk erois sira mehi.

Iha okaziaun ne’e Komisariu portfóliu disiplinar Agapito da Conceição sente orgulhu tebes reprezenta Prezidente KFP mai hamutuk ho Vise Ministru Estatal Jacinto Rigoberto de Deus no PAM hodi fó posse termu aseitasaun ba funsionárius Agente Administrasaun Públika nain 49. Okaziaun ida ne’e rejista nu’udar momentu importante ida iha Administrasaun Públika ein jeral ne’e  progresu  ida reforsa makina Administrasaun Públika iha munisípiu Covalima.

Komisáriu Disiplinar ne’e dehan, liu husi juramentu ne’ebé emposadu sira kompromete ba ida-idak nia aan, manifesta publikamente integra iha pozisaun ne’ebé admite ba ida-idak nia  servisu fatin, ohin loron lahanesan ho uluk kazuais asina fulan 6 ba fulan 6 maibé Ajente Administrasaun Públika tinan ida mak foin asina dala ida, maibé extende tuir avaliasaun dezempeñu husi ida-idak nia superior fó Bom ho muito bom, se iha insufisiente mós bele hapara. Komisaun Funsaun Públika haree mekanizmu oinsá mak sira ne’ebé konkore liu husi teste elektrónika no intervista sira ne’e halo polítika ida oinsá ba aban bainrua sira sai funsionariu permanente.

Entretantu Vise Ministru Estatal, Jacinto Rigoberto de Deus liu husi nia diskursu hato’o ba emposadu sira hateten, nia orgulhu tamba funsionárius nain 49 simu posse termu aseitasaun ne’e aserta loos ho loron bo’ot selebrasaun FALINTIL nia ba tinan 50. Imi mós sai  Ajente  Administrasaun Públika nu’udar servidor Estadu, orgullu bo’ot ba munisípiu Covalima tamba foin primeira vez fó pose ba funsionárius termu aseitasaun ho númeru bo’ot tebes. Ita hotu fó parabéns ba Covalima, tanba Prezidente Autoridade Munisipal Covalima defende orsamentu CRO ba 2026 Covalima ninian propoin funsionáriu ho númeru a’as tamba nia hakarak Suai oan sira atu involve aan ba dezenvolvimentu, prosesa riku natureza ne’ebé iha rai Suai.

Vise Ministru Estatal husu ba emposadus sira labele sente loko-aan, katak imi nain 49 mak makás liu, maibé imi atu hasán naha todan ida iha imi nia kabás ho responsabilidade bo’ot.

Hafoin serimónia asinatura termu aseitasaun kontratu ba AAP nain 49, konyinua ba kari aifunan iha monumentu masakre Setembro Negro 1999 iha Suai hanesan omenajen ba eroi sira ne’ebé tombadu ba patria no funu liberasaun nasional hodi komemora loron FALINTIL ba dala 50 nian iha 20 Agostu.