Comissão da Função Pública

28 Novembru 2020 – Komisaun Funsaun Públika realiza teste promosaun eletrónika ba daruak  ba funsionáriu públiku sira hodi hasa’e grau ba rejime jeral Funsaun Públika iha tinan 2020.

Kandidatus ba iha teste refere hamutuk 9.990, tuir kalendariu hahu loron (28 Outubru to’o 20 Novembru 2020).

Promosaun ne’e hala’o ho efisiente, efikaz, justu ba funsionáriu hodi loke ba rejime jeral sira hotu libre husi interferensia polítika ho apoiu téknika sira ne’ebé onestu, kompetente no kompremetidu, vaga ba promosaun pesoál ho limite 10% ba kada kategoria. Atu asegura prosesu ne’ebé justu ba kandidatu elejibel hotu utiliza sistema digital atu hamenus involvimentu umanu iha prosesu ho efisiensia hodi evita fraude rezultadu, nune’e hafoin ezame kendidatus sira hatene rezultadu preliminar nian imediata iha dashboard, hateten Komisária Portfóliu Rekrutamentu, Seleksaun, Promosaun no Kareira iha Funsaun Públika, Carmeneza dos Santos Monteiro iha nia diskursu abertura promosaun.

Objetivu ba promosaun ne’e KFP ho hanoin ida atu haburas kompetitividade, motivasaun ba funsionariu sira hotu hodi fo serteza ba prosedimentu dezenvolvimentu kareira iha Funsaun Públika. 

Iha tinan 2018 KFP hatoo proposta ba Governu hodi halo promosaun ba funsionáriu públiku hodi Governu aprova dekretu lei 1/2019 hodi asegura promosaun ba funsionáriu sira ho prinsipiu seleksaun pur méritu. Ida ne’e liberdade ba kandidatura, seleksaun pur méritu no kondisoens ho objetivu atu motiva kompetisaun entre kandidatu sira hodi permite funsionáriu sira hodi hasae funsionáriu públiku sira nia grau ne’ebé mak tempu barak la iha promosaun, tanba ne’e KFP hamosu promosaun pur méritu ba funsionáriu iha teritoriu tomak, dehan Ministru MTKI, José Lucas do Carmo da Silva iha nia diskursu.

Hafoin abertura husi membru governu sira, Prezidente no Komisarius Komisaun Funsaun Públika, fahe simbólikamente senhas no usuariu ba kandidatus sira hodi hahu teste ba loron dahuluk (28/10/2020).

Total pergunta ba teste eletroniku hamutuk 100, kobre iha áreas legislasaun Funsaun Públika, konstituisaun RDTL, jéneru no inkluzaun,  istória nasional, administrasaun públika, jestaun, polítika no planeamentu estratéjiku, komunikasaun, koñesimentu báziku ba TIK, monitorizasaun no avaliasaun,  peskiza no análize, matemátika no estatístika bázika, administrasaun no finansas, administrasaun (ofisiu/korespondensia), jestaun finanseira, aprovizionamentu, inspesaun no auditoria, lojístika no patrimóniu, língua tetum no português (iha kompreensaun testu, gramátika no vokabuláriu).

Teste ne’e hala’ o liu husi sistema TCEXAM sei implementa ba turnu haat, turnu rua iha dader hahu 8h00-10h00, 10h00-12h00, sesaun lokraik nian 14h00-16h00 no 16h00-18h00.

Iha teste ba loron dahuluk nian hahu husi grau B ba grau A hamutuk 413, kandidatu ne’ebé tuir teste hamutuk 369 no la tuir teste hamutuk 44.

Iha abertura promosaun ne’e marka prezensa husi membru governu hanesan Ministru Turizmu Komersiu no Industria, Vise Ministru Justisa, Vise Ministru Saúde, Sekretariu Estadu Peskas, Sekretariu Estadu Komunikasaun Sosial, Provedora PDHJ, Reprezentante Embaixada Australia, Juis Konselleiru Tribunal Rekursu no Juri sira.