Comissão da Função Pública

Komisaun Funsaun Públika loke ofisialmente  abertura ba teste promosaun grau ba funsionariu públiku Timor Leste ho total 10.455 hahu husi grau B to’o grau G hodi hasa’e grau inferior ba grau tuir mai. Husi númeru ne’e pursentu sanulu deit mak sei hetan promosaun tuir grau ida-idak konforme rezultadu teste.

Objetivu atu fó oportunidade ba funsionáriu públiku sira ne’ebé prense rekezitus bele tuir teste hodi hasa’e sira nia grau no atu fó serteza ba dezenvolvimentu kareira no hasa’e motivasaun servisu husi funsionáriu públiku sira.

Teste promosaun ne’e primeira vez ne’ebé hala’o iha istória Administrasaun Públika Timor-Leste, tanba desde 2002 to’o 2019 sei bazeia ba ida-idak nia polítika instituisaun ninian, seidauk iha sistema ida ne’ebé mak defini ho didiak kona-ba oinsa atu la’o ba oin kareira profisionais funsionariu ida-idak ninian no barak liu seidauk hetan promosaun, liu-liu funsionárius ne’ebé servisu iha munisipius. Ne’e  hala’o bazeia ba Dekretu Lei nú. 1/2018, rejime promosaun no hetan alterasaun ba Dekretu Lei nú. 5/2019, 27 Marsu.

Hahu ohin ba oin, promosaun sei hala’o regularmente tinan – tinan, ba sira ne’ebé seidauk promovidu bele tuir fali iha tinan oin mai, nune’e deit to’o susesu.

Total pergunta ba teste eletroniku hamutuk 100, kobre iha áreas administrasaun finansas, jestaun, matemátika, jéneru, língua tetum no português, legislasaun Funsaun Públika, istória Timor, konstituisaun RDTL no áreas seluk ne’ebé hala’o iha servisu fatin lor-loron.

Teste loron ida iha 350 kandidatus ba dader 175 no lokraik 175 kandidatus. Promosaun ne’e hahu ohin (6/08/2019) to’o fim fulan Setembru 2019, iha edifisiu eis Casa Europa.