Comissão da Função Pública

Kinta feira, 20 Janeiru 2022, Komisaun Funsaun Públika hatan ba pedidu konvite husi Komisaun A Parlamentu Nasional mai partisipa hodi fó Komisaun Funsaun Públika nia pareser sira, ninia hanoin tékniku sira kona-ba proposta alterasaun lei lei númeru 7/2009, 15 jullu no Estatutu Komisaun Funsaun Públika.

Presidente esplika, partilla ba malu hanoin sira liga ho jestaun rekursus umanus liga ho vantajen no desvantajen alterasaun lei KFP.

“Ohin ami hamutuk mós ho parte Governu ninian nu’udar proponente ba proposta alterasaun lei refere ami partilla ba malu hanoin, pensamentus hahú kedas husi presupostu sira ne’ebé mak hamosu proposta lei refere no hare mós ba vantajen no desvantajen sira ne’ebé mak mosu, wainhira proposta lei refere hetan duni aprovasaun iha Parlamentu Nasional.

Iha kontestu Timor-Leste ita iha modelu jestaun rekursus umanus ne’ebé diferente,úniku la hanesan ho paíz barak iha mundu ne’ebé adopta desde 2009. Modelu hibridu mistu ida ne’ebé kombina vantajen husi modelu hierarkiku ministerial ho modelu komisaun ninian ne’ebé independente. Maske iha konstituisaun RDTL koa’lia kona-ba Administrasaun Públika eh Funsaun Públika xefia husi Xefe Governu iha Governu nia okos,” esplika Prezidente KFP, Faustino Cardoso Gomes hafoin audiênsia ho Komisaun A Parlamentu Nasional trata ba asuntu konstitusionais no justisa.

Iha kontestu ne’e KFP partilla esperiensia, lalaok Funsaun Públika durante ne’e hare kona-ba jestaun funsaun rekursu umanus nian. Bazeia ba proposta ne’ebé iha, hasai hotu husi KFP no Governu mak sei asume plena responsabilidade ba iha jestaun rekursus umanus haktuir ba modelu tradisional hierarkiku ne’ebé mak iha istória estadu nian. Iha esperensia ne’ebé mak iha 2009 ita opta ba iha modelu hibridu ne’ebé kombina entre modelu tradisional hierarkiku no modelu Komisaun nian.

Ba partillamentu hanoin hirak ne’e sei deside husi parte polítika maibé nu’udar tékniku profisional hato’o ninia pareser sira hodi sai hanesan referensia ba iha implementasaun ba tempu oin mai.

Partisipa mós iha audiênsia ne’e Ministru husi Prezidensia Konsellu Ministru, sr. Fidelis Magalhães ho nia ekipa no Prezidente no Komisárius KFP, Sekretaria Ezekutiva SKFP ho Diretor DNAJ.