Comissão da Função Pública

Ekipa integradu husi Komisaun Funsaun Publika-KFP, Provedoria Direitos Humanus no Justisa-PDHJ, Sekretariu Estadu Igualdade no Inkluzaun-SEII, Ministeriu Edukasaun-ME, Institutu Jestaun Ekipamentus-IJE, Institutu Nasional Seguransa Sosial-INSS no reprezentante  Patrimoniu Estadu husi Diretor  Geral  Finansas  hala’o  Disseminasaun  ba Funsionáriu Públiku sira durante loron  rua  iha Postu  Administrativu  Luro Munisipiu Lautem husi loron  23-24  Agostu Tinan  2023 hodi fahe koñesimentu kona-ba Kodigu Etika mak dalan ba Governasaun di’ak, Melhor Servisu ba Publiku.

Iha forum Disseminasaun ne’e kada Instituisaun Governu nia Reprezentante aprezenta nia Materia liga ho Instituisaun nia servisu ba partisipantes sira, kona-ba regras ne’ebé regula Funsionáriu Públiku sira nia servisu tuir lei haruka, liu husi orientasaun Superior, iha dever atu kumpri no hala’o, proibisaun sira, hala’o servisu tuir regras, rai segredu Estadu nian.

Iha abertura Disseminasaun Administrador Postu Administrativu Luro Agusto Feliciano Ramos Branco hato’o bemvindu ba Ekipa Disseminasaun Konjunta no enkoraja Funsionariu sira atu fó atensaun ba Oradores sira nia aprezentasaun, enkoraja partisipante sira atu husu, karik ladun entende hodi kompriende lolos kna’ar Funsionáriu sira nian hodi hala’o tuir regras ne’ebé estabelese ona.

Prezidente KFP Faustino Cardoso Gomes iha nia intervensaun hateten, Disseminasaun ne’e hanesan opurtunidade ida oportunu tebes, iha kedas inisiu nonu Governu Konstituisional ninian, klaru nu’udar Funsionáriu Públiku tenke prontu servi ho di’ak, bazeia ba boa Governasaun ninian, oinsa mak  atu  asegura  implementasaun  polítika nonu Governu nian, hanesan ita hatudu tiha ona iha tempu kotuk ba Governasaun selu-seluk  ne’ebé liu ona ne’e.

Tuir Prezidente, Boa Governasaun ne’e mak la’o tuir regras Formal, prosedimentus lei  ne’ebé  iha inklui mós ita  nia koñesimentu, se karik ita nia koñesimentu la’o to’o mak Governasaun ne’e bele afetadu, tanba kondisaun sira hanesan ne’e mak KFP hamutuk ho Orgaun Estadu ne’ebé prezentes integradu halo kooperasaun servisu apoiu husi Administrador Postu Luro ho nia tekniku sira nian, atu partilla koñesimentu ba malu, ne’e bele la’o ho efetivu hodi hametin koñesimentu atu hala’o boa Governasaun  ne’e la’o tuir espetativa sira.

Ita hatudu kompetensia tuir área responsabilidade ida-idak nian, hamosu satisfasaun ba Povu, nune’e Povu kontinua fo konfiansa ba Governu, Funsionáriu nia papél importantisimu mak ida ne’e duni.  Partisipantes ne’ebé marka prezensa iha Disseminasaun ne’e ho total  83  pessoas kompostu  husi  Feto 21 no Mane 62.