Comissão da Função Pública

Aileu, 21 Novembru 2025 – Ekipa konjunta kompostu husi Komisaun Funsaun Públika (KFP), Komisaun Anti Korupsaun (KAK), Inspetoria Jeral Estadu (IGE), Provedoria Direitus Humanos no Justisa (PDHJ), Ministériu Finansas-Diresaun Jeral Jestaun Patrimoniu Estadu (MF-DJJPE) hala’o vizita surpreza ba iha Diresaun Servisu Notariadu no Diresaun Servisu Saúde Munisípiu Aileu.

Objetivu hosi vizita ne’e mak atu halo observa no haree direta ba funsionamentu atendimentu ba públiku, haree mós ba iha fasilidades servisu, no mós verifika lista prezensa funsionáriu sira. Vizita ida ne’e atu identifika difikuldade sira ne’ebé instituisaun estadu hasoru hodi fornese servisu di’ak ba komunidade no atu garante katak funsionáriu públiku sira kumpre sira-nia obrigasaun serbisu.

Durante vizita ba iha Diresaun Servisu Notariadu KFP observa ba lista prezensa no nota katak formatu lista prezensa ne’e di’ak, ho oras tama no sai serbisu hakerek kompletu, atendimentu ba komunidade sei lentu tanba, komunidade sira lori oras barak hodi hein ba atendimentu hodi foti pasaporte ka Billete Identidade (BI).

Enkuantu, Diretór Notariadu, Amaro de Fátima, rekoñese katak informasaun ne’e loos, tanba ahi mate, rede la la’o, no sistema avaria. Kona-ba pasaporte, tuir orientasaun hosi Nasionál, loron ida sira bele atende de’it ema na’in 15. Prioridade Atendimentu husi Diresaun Notariadu fó prioridade liu ba ema defisiente, feto isin rua, no ferik katuas sira ne’ebé mai halo rejistu kriminál ka BI.

Diretor Notariadu hateten, iha difikuldade ba ekipamentu sira hodi halo atendimentu sira.

“Difikuldade ida mak ne’e no ida seluk mak ekipamentus ba halo atendimentu iha ne’e, kamera, komputadór ho nia asesóriu unidade ida de’it mak uza ba atende pasaporte no BI. Estoke kartaun BI blanko original laiha, nune’e sira fó de’it kartaun provizóriu ho surat tahan mutin. Relatóriu kona-ba nesesidade ekipamentu hato’o beibeik ona ba Nasionál maibé seidauk iha resposta konkretu.” Diretór Amaro de Fátima hateten.

Durante vizita ekipa konjunta identifika Forsa Traballu Notariadu ne’ebé halo atendimentu iha munisípiu Aileu hamutukn a’in 18 (Feto 11, Mane 7).

Nune’e ekipa konjunta vizita daruak ba Diresaun Servisu Saúde Munisipál Aileu hodi konfirma direta kona-ba lala’ok serbisu, ekipamentu, forsa traballu, estoke ai-moruk, no transporte.

Ekipa konjunta konfirma, Forsa Traballu ne’ebé halo atendimentu iha munisípiu Aileu ho total na’in 152 (rejime jerál 27, rejime esplesiál 125, kontratadu 13). Ministeriu Saúde rekruta tan profisionál na’in 82 atu reforsa atendimentu. Ba ekipamentu Administrasaun sufisiente, maibé transporte mak menus liu, hanesan iha motorizada 37, iha motorizada a’at 26, no iha 11 de’it mak sei funsiona, no kareta Ambulánsia tuan 2 la funsiona di’ak no dala ruma avaria.

Diretór João de Jesus rekoñese katak profisionál saúde sira esforsu an halo atendimentu, maibé la ho másimu tanba infrenta difikuldade no tenke tuir kondisaun ne’ebé eziste.

Nune’e komunidade iha área rurál dala barak la kontente ho atendimentu, tanba profisionál saúde sira ba tarde, estoke Ai-moruk sufisiente atu atende nesesidade, no iha kada Postu Saúde koloka na’in tolu atu halo atendimentu loron-loron.

Nune’e ekipa konjunta nota mós iha lista prezensa la uniforme, lahakerek oras tama sai servisu nian, no husu ba sira atu hakerek oras kompletu hodi bele hatene funsionáriu ne’ebé mai servisu tarde maibé sai sedu antes tuku 17:30, wainhira la kumpri ba regras no prosedimentu mak sei hetan sansaun ruma hanesan koa saláriu no repreensaun oral.