Comissão da Função Pública

Ekipa konjunta reativa hikas kontrolu ba patrimoniu Estadu iha tempu bainbain no mós iha tempu feriadu ba Finadu nian, atu asegura efisiensia no efetividade patrimoniu Estadu hodi hamenus despeza finanseira, kestaun ne’e hato’o husi Diretor Jeral Patrimoniu Estadu Ministériu Finansas.

Ho ida ne’e Ekipa fiskalizasaun konjunta ba viaturas Estadu kinta feira, (27/10/2022) halo konferensia imprensa hodi apela ba pesóal eh ministériu sira ne’ebé uza kareta Estadu labele uza patrimóniu Estadu iha tempu feriadu no finadu.

Informa kona-ba nesesidade ekipa fiskalizasaun ekipa konjuntu hodi halo check point eh kontrolu ba movimentu veíkulu Estadu tantu kareta no motor Estadu iha âmbitu selebrasaun loron boot finadu ninian, bazeia ba rezolusaun Governu 130/2021, kona-ba jsetaun no realokasaun veíkulu Estadu no padraun prosedimentu operasional (PPO) ba realokasaun no utilizasaun veíkulu Estadu pool iha ministériu no instituisaun Estadu sira hotu, no reforsa mós ho dekretu lei nú.21/2021 kona-ba subsídiu mensal transporte ba funsionáriu públiku sira. Ida ne’e fó kompeténsia no mandatu ba ekipa fiskalizador sira hodi kontinua regularmente halo kontrolu ba movimentu viatura Estadu, esplika Diretor Jeral Jestaun Patrimoniu Estadu-Ministériu Finansas, Januário da Gama.

Objetivu husi atu kontinua halo melloramentu ida, oinsá iha efisiensia, efitividade ba utilizasaun patrimóniu Estadu nu’udar rekursu Estadu ninian  ao mezmu tempu bele kontribui ba iha despezas Estadu nian.

Kuandu veíkulu Estadu mak la kontribui ba iha fins nesesidade servisu nian mak sei kontribui ba iha despeza Estadu ne’ebé boot liu tan. Tuir VII Governu Konstitusional ninia polítika  oinsá atu kontribui ba efisiensia, efetividade servisu, liu-liu oinsá bele promove poupansa ida ne’ebé signifikante ba despezas Estadu nian liu-liu ba iha utilizasaun veíkulu  Estadu nian, hateten, Diretor Jeral Patrimóniu Estadu.

Wainhira iha iregularidade no prosesu infratór sira halo ekipa konjunta sei haree no enkamiña ba KAK haree ba kazu krime no uzu pekulatu no KFP nia parte halo prosesu disiplinares no administrativa ba funsionáriu ne’ebé halo iregularidade.

Ekipa konjunta kompostu husi Komisaun Anti Korupsaun (KAK), Komisaun Funsaun Públika (KFP), Diresaun Jeral Jestaun Patrimóniu Estadu – Ministériu Finansas, Diresaun Nasional Transporte no Terestre – Ministériu Transporte no Komunikasaun no Polísia Nasional Timor – Leste (PNTL).