Comissão da Função Pública

Kinta-feira, 13/02/2025- Ekipa Integradu Kompostu KFP, CAC, IGE no Patrimoniu Estadu kontinua hala’o aktividade vizita surpreza ba iha Diresaun Nasional Transporte Terrestre iha Balide, diresaun tratamentu karta kondusaun iha Akanunu Hera no diresaun trata KIR kareta no motor nian iha Comoro.

Komisariu Komisaun Funsaun Públika Portefoliu Disilinar, Agapito da Conceinção dehan, objetivu vizita surpreza ba iha DNTT atu kontribui ba hadia no mellora kualidade sistema atendimentu ba públiku.

Durante vizita surpreza ekipa tekniku sira halibur dadus inklui lista prezensa iha kada departamentu, hafoin sei analiza no halo konkluzaun ruma kona-ba erru ne’ebé akontese durante ne’e iha DNTT. Enkuantu difikuldade ne’ebé DNTT enfrenta maka menus fasilidade hanesan komputador, transporte, menus rekursu umanus, ekipamentus CCTV no finger print ne’ebé avaria hodi difikulta ba servisu atendimentu publiku no regula disipina funsionariu sira tama sai servisu.

Liga ba servisu broker iha DNTT ne’ebé durante ne’e sai mós preokupasaun públiku, Komisariu Agapito da Conceicão esplika, KFP mós simu informasaun husi públiku kestiona kona-ba servisu Broker iha DNTT, maibé ekipa nia vizita surpreza la konsege detekta, karik iha ekipa tekniku nia rekollamentu ba informasaun iha kada diresaun detekta iha indikasaun ba servisu broker iha DNTT sei aplika sansaun tuir grau iregularidade ne’ebé komete. Relasiona ho lista prezensa ne’ebé ekipa tekniku rekolla hafoin ekipa verifika no halo konkluzaun.

Adjuntu CAC ba Prevensaun no Sensibilizasaun, Rosario Salsinha de Araujo reforsa, vizita surpreza atu fó hanoin no korajen ba funsionariu DNTT atu serví di’ak ba públiku maibé, sempre hasoru risku tamba, ema barak loron-loron sei tenta no posibilidade bele fo osan, fo sasan no promesas.

Adjuntu KAK dehan, lei kodiku penal bandu atu funsionariu públiku halo servisu broker simu osan no simu sasan ruma husi atendimentu públiku maibé, CAC mós simu informasaun kona-ba broker iha DNTT maske seidauk kaer toman. Tamba ne’e CAC sei destaka pesoal balun hodi tau matan ba asuntu broker iha DNTT, akontese duni ga lae. Funsionariu mak servisu broker hanesan violasaun boot no bele kriminaliza nia konsekuensia hasai husi servisu ba kumpri kastigu iha kadeia. Alende vizita n’e ekipa identifika, maka menus ekipamentus komputador, rekursu umanus maibé, servisu importante liu maka ai oan sira iha dalan ibun sira hahú at presiza hadia, kareta foun regista kada fulan kuaze mil ital, estrada sira hahú klot ba beibeik bainhira la halo jestaun di’ak sei fo risku ba dezastre.

CAC mos identifika reseita Dili-Oecussi kareta iha fim tinan 2024 ás tebes, lahatene kala frekuensia/volume servisu maka aás liu tamba kareta 5 mil ne’ebé halo movimentu vezes osan 35 dolar kada kareta konta rasik hira? Tamba ne’e hahú hanoin polítika di’ak oinsá maka bele uza AERO no RO AHI Timor nian rasik ho kustu ne’ebé menus.

Diretora DNTT, Maria Antonia Victor da Costa agradese ba vizita surpreza ekipa konjuta iha DNTT bele hare diretamente kondisaun no fasilidade servisu DNTT nian, ne’ebé durante ne’e fasilita servisu hodi halo atendimentu ba publiku. Liga ba funsionamentu CCTV no finger print la funsiona hodi kontrola disiplina oras servisu tama sai funsionariu sira nian no sei kontrola husi lista preaensa lor-loron. Oras tama servisu tuku 8.00 toó tuku 8.15, enkuantu lista prezensa funsionariu ida asina atrazu dala haat tui-tuir malu konsidera falta servisu durante loron ida.

Liga ba servisu broker iha DNTT, tuir Diretora Nasional DNTT Maria Antonia Victor da Costa katak, informasaun sira ne’e espalla iha media sosial kona-ba involvimentu funsionariu DNTT balun halo servisu broker, hein katak ho vizita surpreza ne’e ekipa konjunta sei fo hanoin nafatin ba funsionariu atu halo servisu direta ba iha atendimentu publiku tuir regras no lei ne’ebé iha.

Diretora DNTT dehan, durante ne’e DNTT no BNCTL iha koordenasaun servisu di’ak atu bele rekonsilia reseita kada fulan ne’ebé DNTT rekolla, tenki sinkroniza ho relatoriu DNTT. Reseita DNTT mai husi rejistu veikulus, inspesaun veikulus, karta kondusaun, guia de marcha, no infrasaun ba transporte publiku iha kada terminal iha kapital Dili no Munisipiu sira.