Comissão da Função Pública

Ministru Justisa Amándio Benevides, segunda-feira 23-10-2023 ofisialmente halo abertura ba formasaun loron 5 ho tema Promove Efisiénsia no Hasa’e Profesioalizmu Funsionáriu Públiku iha Munisípiu Liquiça Postu Maubara iha Madre Carmelita.

Iha abertura, Ministru Justisa hateten, formasaun ne’e atu promove efisiénsia no hasa’e profesioalizmu Funsionáriu Públiku, atu servi ba Estadu no povu, atu halo servisu di’ak hodi atende nesesidade komunidade no husu funsionáriu sira atu aproveita didiak durante semana ida nia laran.

Governante ne’e preokupa ho deskrisaun de tarefa servisu husi Xefe Departamentu no Seksaun Ministériu Justisa nia ne’ebe maka ládun responde ba nesesidade sira tuir prosedimentu ga regras ne’ebé ezista.

Bazeia ba ne’e Ministru Amándio Benevides rekomenda ba Funsaun Públika atu oinsá fó formasaun ba kargus no xefia sira atu bele responde lalais nesesidade Ministériu nia relasiona ho atendimentu di’ak ba públiku iha futuru, tuir avaliasaun dezempañu servisu kuotidiana tuir planu asaun anual.

Enkuantu Komisria Maria de Jesus Sarmento elojia inisiativa ne’ebé Ministériu da Justisa halo, alénde hasa’e profesionalizmu Funsionáriu Públiku nian, maibé sira mós presiza sertifikadu ida ho 40 oras de pontuasaun iha Promosaun tuir Dekretu Lei 38/2012 de 01 de Agostu, hatu’ur direitu funsionáriu sira nune’e ajuda funsionáriu sira oinsá dezenvolve iha kareira.

Komisária subliña, formasaun ne’e ninia ezijénsia maka fó atensaun didiak ba iha materia sira ne’ebé maka Formador sira hato’o durante loron lima nia laran, atu nune’e bele hasa’e koñesimentu no kapasidade hodi halo atendimentu ba públiku em jeral.

Nu’udar Funsionáriu Públiku Estadu rekoñese katak, hanesann mákina Estadu ema ho kualidade  no atu aprende wainhira ingresa ona iha Funsaun Públika ho abilidade oituan ne’ebé iha, maibé ho oportunidade ida ne’e presiza aprende liu tan, adianta Komisária.

Tuir relatóriu husi Diretora Jeral Ministériu Justisa katak, formasaun ne’e mai husi formasaun daruak, husi Diresaun Jeral sira iha ámbitu Ministériu Justisa hamutuk ema nain 26 kompostu husi Diresaun Jeral Terras e Propriedades nain 13, Diresaun Jeral Servisu Lojístika Notariadu nain 4, Diresaun Nasional Servisu Rejional Jestaun Sosial nain 3, Sentru Formasaunn Jurídika nain 2, PSIK nain 2, DNHC nain 1 ho orsamentu Jeral Estadu tinan 2023 ho total 17 mil 270 dólares Amerikanu, ne’ebé maka sei kobre ba viajen lokal, partisipante, ba formador, ba Komisaun Organizadora, ekipa suporta, hanesan eselénsia  Ministru ho Komitiva, ekipa Formador husi INAP no seluk tan.