Comissão da Função Pública

Funsaun Públika Timor-Leste Komemora Loron Nasional Funsaun Públika (LNFP) dalima hamutuk funsionarius Públikus no Ajente Administrasaun Públika, horseik (15/07), iha Igreija Motael.

Selebrasaun  LNFP hahu ho misa agradesimentu iha Igreija Motael ne’ebé prezide husi Amo selebrante Padre Juvito de Araújo do Rêgo de Jesus.

Iha Padre Juvito nia homilia hatete katak, nudar funsionariu públiku ita hotu dezempeña papel iha Funsaun Públika nia laran tuir étika, valores, tuir mós estatutu estrutura ne’ebé funsiona iha Funsaun Públika.  Funsionariu Públiku la presija antagonizmu partidu polítiku tama iha neba, maibé presija hala’o knar ho efetividade, efisiensia no efikasia , presija hatudu empatia no simpatia, profisionalizmu iha Funsaun Públika tuir lei no funsaun atu privilejia, maibé atu serví no ezerse servisu ho diak.

Hafoin missa kontinua kedas ho serimonia konfraternizasaun, iha Prezidente KFP nia diskursu hateten, funsionariu sira Funsaun Públika Timor – Leste tenki iha espíritu unidade, asaun hamutuk ba oin atu oinsa mak bele halo servisu ho diak, sein egoizmu institusional atu nune’e bele fo satisfasaun ba povu sira liu husi ita nia prestasaun servisu ne’ebé mak iha.

Prezidente KFP hatutan, Funsaun Públika Timor-Leste kontinua evolui, forma no reforma, inkrementalmente, maske kontinua hasoru dezafiu sira oi-oin. Maibé lider Funsaun Públika ne’e husu ba funsionariu sira tenki orgullu ho konkista sira mak ita alkansa to’o ohin loron no ho esforsu sira mak ita investe tiha ona no kompromete atu hodi konsolida liu tan, bazeia ba prinsipiu no valor sira mak sustenta Funsaun Públika Timor-Leste.  

Serimonia ne’e priense ho fahe premius ba manan nain sira ba modalidades desportivas, kompetisaun koral no tasa rotativa ba tinan ne’e monu ba Universidade Nasional Timor Lorosa’e nia liman. Iha sesaun ne’e mos dada sorteiu ba Komisaun Organizadora ba daneen nian iha tinan 2020 no rezultadu sorteiu monu ba Ministeriu Turismu Komersiu no Industria (MTKI).

Serimonia ne’e hetan partisipasaun husi membru governu balun, Komisariu KAK, Adjunta PDHJ, no funsionariu hotu no organiza husi Komisaun Organizadora MInisteriu Justisa hamutuk Komisaun Funsaun Públika.