Comissão da Função Pública

Komisáriu portefóliu ba Disiplinar iha Komisaun Funsaun Públika, Agapito da Conceição prezensa iha programa POVU NIA MATADALAN iha rádiu METRO  FM ne’e realiza iha kuarta feira ne’e (08/05/2024) hodi ko’alia kona-ba asuntu disiplinar ninian.

Iha entrevista ne’e Komisáriu ba portefóliu disiplinar hahú ho ninia observasaun ba Diresaun Disiplinar ne’ebé servisu ba asuntu disiplinares ninia durante ne’e servisu investigasaun la’o di’ak de’it, maibé presiza formasaun hodi haklean liutan sira nia koñesimentu, hasa’e kapasidade invigador sira atu sai profisional liu tan no ho kualidade.

Komisáriu hateten, IV Mandatu KFP planeia ona, presiza fornese kapasitasaun no formasaun espesífiku ba área investigasaun, auditoria no inspesaun nian ba invstigador no auditor sira iha Sekretariadu KFP, promove delegasaun kompeténsia iha ámbitu investigasaun disiplinar ba Gabitene Inspesaun no Auditoria sira ne’ebé eziste iha ministerial sira, kria manual servisu inspesaun no auditoria nian, adosaun iha uzu sistema digitalizasaun hodi asegura akompañamentu no monitorizasaun ba iha implementasaun desizaun sira, promove boa governasaun, liu husi reativasaun atividade vizitas surpreza no mós halo monitorizasaun ba instituisaun sira hodi asegura kumprimentu ba lei no regulamentu.

Hanesan Komisáriu portefóliu esplika, bazeia ba lei nú. 7/2009, 15 jullu ne’ebé kria KFP fó kompeténsia ba KFP atu instaura prosesu disiplinar, aplika pena ba funsionárius públikus no ajente administrasaun públika sira, no tuir estatutu funsaun públika funsionáriu no ajente ne’ebé mak viola dever ka abuza nia funsaun iha kualker forma ruma hodi prejudika prestijiu estadu nian sei hetan sansaun disiplinar no la taka dalan ba sansaun sira seluk mak hanesan penal no sivil sira seluk tuir artigu 73 nú. 1 estatutu funsaun públika no previstu iha estatutu refere. Alende ne’e kazu ne’ebé Komisaun haree krime no sivil sei enkamiña Ministériu Públiku nune’e mós kazu administrativa ruma ne’ebé Ministériu Públiku hetan sei enkamiña mós mai KFP hodi instaura tuir prosesu administrativa ninian.

Nune’e Komisáriu ne’ebé asume ba portefóliu disiplinar apela ba funsionárius públikus no ajentes administrasaun públika  iha teritóriu laran tomak atu hala’o knár  presiza kumpri ba regra no regulamentu sira, liu-liu dever sira ne’ebé vigora iha estatutu funsaun públka, bainhira sees husi ida ne’e mak konsidera hanesan infrasaun no sei afeta ba funsionáriu sira nia kareira profisional.

Progama ne’e servisu hamutuk entre Komisaun Funsaun Públika liu husi Unidade Protokolu no Komunikasaun Sosial no Sekretariu Estadu Komunikasaun Sosial, liu husi Rádiu METRO FM.