Comissão da Função Pública

Díli, 06 Novembru 2023 – Funsaun Públika Timor-Leste realiza teste promosaun eletrónika ba dalima  ba funsionáriu públiku sira hodi hasa’e grau ba rejime jeral Funsaun Públika iha tinan 2023 ba kandidatu hamutuk 7,359.

Teste eletrónika ne’e hala’o bazeia proposta Komisaun Funsaun Públika ne’ebé hetan aprovasaun husi Konsellu Ministru bazeia ba rezolusaun Governu núm. 19/2022, 4 maiu, ne’ebé fiksa numeru vagas ba promosaun pessoal ba rejime jeral kareira iha Administrasaun Públika.

Ne’ebé ho kuota 10% ba kada grau hodi bele implementa ba promosaun 2023, bazeia ba Dekretu Lei 1/2018 alteradu ba Dekretu Lei 5/2019, 27 Marsu kona-ba rejime promosaun kareira iha Administrasaun Públika, ho total 7,359 funsionárius públikus no sei passa ba promosaun grau hamutuk 783.

Objetivu kontinua fó oportunidade ba funsionáriu públiku sira ne’ebé prense rekezitus bele tuir teste hodi hasa’e sira nia grau no atu fó serteza ba dezenvolvimentu kareira no hasa’e motivasaun servisu husi funsionáriu públiku sira hodi hatan ba prestasaun servisu Administrasaun Públika ho kualidade, profisional, efikaz no efisiensia.

Komisária KFP asuntu ba rekrutamentu no promosaun iha funsaun públika, Carmeneza dos Santos Monteiro hateten, promosaun ne’e konserteza ba funsionáriu rejime jeral  ne’ebé  realiza kada tinan ida-idak iha oportunidade atu konkore liu husi ezame ba Promosaun ne’ebé funsionáriu sira atu asesu ba oportunidade atu ezersa  sira nia direitu hodi konkore ba  kategoria ne’ebé aas liu iha sira nia kategoria nivel atual, tuir dekretu lei estabelese, ho padraun no prosedementu sira ba prosesu ida ne’e inklui determinasaun vaga disponibiliza husi Governu.

Komisária adianta, promosaun ne’e kompetitivu no  hanesan halai maratona, se mak halai lais no uluk nia mak sei manan, tanba ne’e nafatin atu fokus hodi hakas aan ba, no promosaun ne’e nu’udar mekanizmu no sistema ne’ebé klaru ba funsionáriu públiku sira atu serteza ba progresaun kareira iha administrasaun públika.

Iha tempu hanesan Vise Ministru asuntu ba fortalesimentu institusional saúde, José dos Reis Magno reprezenta governu enkoraja kandidatus sira ne’ebé mak tuir teste ba dala lima ona, liu husi mekanizmu transparente no di’ak tebes ba funsionáriu públiku sira atu eleva kareira profisional, teste ne’e ba dala lima, tips barak mak hetan ona no durante dala haat hala’o ona no ba dala lima fiar katak, bele ona oinsá atu enfrenta oportunidade di’ak ne’e hodi hakas aan hodi bele passa.

Nune’e, KFP kontinua servisu hamutuk ho MNEK, no juri sira husi liñas ministeriais sira nomeadu ba kada grau.

Bazeia ba total kandidatu elejibel ba teste eletróniku ba promosaun tinan ne’e hanesan tabela tuir mai:

Alende ne’e KFP alista funsionáriu ne’ebé  haknar an iha rai liur iha embaixadas no konsuladu sira tuir dadus fixa hamutuk 27.

Total pergunta ba teste eletroniku hamutuk 100, kobre iha áreas legislasaun Funsaun Públika, konstituisaun RDTL, jéneru no inkluzaun,  istória nasional, administrasaun públika, jestaun, polítika no planeamentu estratéjiku, komunikasaun, koñesimentu báziku ba TIK, monitorizasaun no avaliasaun,  peskiza no análize, matemátika no estatístika bázika, administrasaun no finansas, administrasaun (ofisiu/korespondensia), jestaun finanseira, aprovizionamentu, inspesaun no auditoria, lojístika no patrimóniu, língua tetum no português (iha kompreensaun testu, gramátika no vokabuláriu).

Teste ne’e hala’ o liu husi sistema TCEXAM sei implementa ba turnu tolu iha dader hahu 8h30-10h30, sesaun lokraik nian 13h00-15h30 no 16h00-18h30, ho total kandidatu elejibel ne’ebé tuir ezame hamutuk 450 ba kada loron no kada turnu 150 pessoas mak sei tuir ezame eletróniku.

Partisipante no konvidadu husi Membru governu hanesan vise ministru saúde asuntu fortalesimentu institusional saúde nian, Sekretariu Estadu Protesaun Sivil, Xefe Casa Civil Prezidensia Repúblika, Inspetoria Jeral Estadu, koordenadora PROSIVU,  reprezentante husi Ministériu Interior, MESSK, MTC, reprezentante Sekretariu Estadu Florestas no juri sira husi liñas ministeriais sira nomeadu ba kada grau.

Atividade promosaun rekore durante loron 14, hahú husi 6 novembru to’o 23 Novembru 2023 no hetan kolaborasaun servisu hamutuk ho Bombeirus, PNTL, Ministériu Saúde.