Comissão da Função Pública

Dili, Segunda-feira, 24 Novembru 2025 – Ekipa kuadrilaterál boa governasaun, kompostu husi Provedoria Direitu Umanu no Justisa (PDHJ), Komisaun Funsaun Públika (KFP), Komisaun Anti Korrupsaun (KAK) no Inspetór Jerál Estadu (IJE), kontinua hala’o formasaun kona-ba “Prevene no kombate korrupsaun hodi promove Governasaun Di’ak no proteje Direitu Umanu iha fatin servisu Administrasaun Públika”.

Formasaun ne’e hala’o ba kargu diresaun no xefia iha Ministériu Planeamentu Investimentu Estratéjiku (MPIE), ho totál partisipante na’in 64 (feto na’in 25 no mane na’in 39), ne’ebé iha salaun Sentru Nasionál Chega (CNC), Balide, Dili.

Iha serimónia abertura, Prezidente KFP, Agostinho Letêncio de Deus, hateten katak formasaun ne’e la’ós de’it kona-ba prevene korrupsaun no promove Governasaun Di’ak, maibé mós atu proteje direitu no regalia funsionáriu sira, liuliu direitu ba formasaun 40 oras no kontrolu instituisionál ba servisu.

Prezidente KFP rekoñese katak dala ruma funsionáriu sira hato’o pergunta, “Se ha’u la kaer osan, tanba sa tenke ba tuir formasaun? Se iha ha’u-nia servisu loron-loron hatene de’it mak dokumentus sira, tanbasá tenke lakon tempu ba oras 40 hodi tuir formasaun?”

Nia esplika katak importánsia loos husi formasaun ne’e maka atu fanu beibeik funsionáriu sira kona-ba Administrasaun Públika.

Nia subliña, Estadu sei proteje direitu funsionáriu ida-idak liuhusi servisu kontrolu, no kazu konkreta hanesan deklarasaun rikusoin nu’udar protesaun ida wainhira mosu akuzasaun ruma husi públiku.

Autoridade KFP ne’e hatutan, atu iha kontrolu ida kontínuu, instituisaun kuadrilaterál ne’e hala’o programa formasaun no atividade vizita surpreza ba instituisaun Estadu sira atu proteje no fanu funsionáriu sira atu labele monu ba tentasaun negativu ruma.

Prezidente Agostinho Letêncio de Deus apela ba partisipante sira, atu rona no partisipa másimu ba materia ne’ebé aprezenta.

“Husu ba partisipante formasaun labele mai partisipa no rona de’it, maibé halo diskusaun ativa ho formadór sira hodi hatene ho klaru, atu iha servisu loron-loron kuidadu an atu labele monu ba iha tentasaun negativu ruma. Formasaun refere hanesan dalan ida atu deskobre problema sira ne’ebé mosu iha ida-idak nia karreira servisu.” Apela nia.

Nia mós dehan katak prezensa Ministru MPIE nian nu’udar sinál katak, Governu la’ós de’it eziji servisu husi funsionáriu sira, maibé mós fó oportunidade atu deskobre no rezolve problema sira ne’ebé infrenta.

Prezidente KFP subliña katak KFP daudaun ne’e iha prosesu reforma hodi fó atensaun boot ba formasaun sira, tanba iha futuru progresaun no promosaun sira depende mós ba formasaun obrigatória.

“Kada funsionáriu, kuandu nia karreira aumenta liu tan, kuandu nia kargu aumenta liu tan, prevensaun detallu liu tan… Promosaun karreira anuál, maski la’ós automátiku, maibé eziji rekizitus formasaun nu’udar rekizitus ne’ebé aas entre rekizitus hotu-hotu.”

Prezidente KFP eziji prontidaun husi partisipante sira atu tuir formasaun ho di’ak hodi kontribui ba Boa Governasaun.

Formasaun ne’e ofisialmente loke husi Ministru MPIE, ho partisipasaun másimu husi Komisáriu KAK, Provedoria Direitu Umanu no Justisa, inklui Diretór Ezekutivu CNC.

Hafoin abertura, Inspetora KFP, Sónia da Silva Soares, aprezenta matéria kona-ba “Promove integridade funsionáriu públiku ba jestaun efisiénsia no efikásia rekursu Estadu nian no Dever no Direitu funsionáriu públiku”.

Formasaun ne’e sei hala’o durante loron tolu, hahú husi loron 24/11/2025.