Comissão da Função Pública

Ligadu ba kazu indisius projetu ne’ebé Komisaun Anti Korupsaun (KAK) ba halo buska suspeita dirijente nain rua husi Ministériu Agrikultura Peskas Pekuaria no Floresta (MAPPF) ba dokumentu sira balun iha suspeitu sira nia rezidensia baze ba mandadu judisíal Tribunal Judisiál Primeira Instansia Díli ho númeru 0004/24.CAC-TL iha loron (09/10/2024), relasiona ho kazu ne’e Komisaun Funsaun Públika ninia parte liu husi Komisáriu Komisaun Funsaun Públika ba asuntu disiplinar esplika, ba suspensaun kargu ba dirijente nain rua ne’e.

“Kargu suspende, tanba antes KAK ba halo intervensaun iha MAPPF ligadu ba mensajen whatsaap ne’ebé virál iha facebook fó projetu ba malu, Komisaun Funsaun Públika husu ba Ministru atu halo suspensaun ba ninia kargu, hodi delega fali ba diretor ou funsionarius ruma atu nia bele konsetra ba halo justifikasaun ba kazu sira ne’ebé mak virál iha media sosial”, Esplika Komisáriu Agapito da Conceiçao.

Komisaun Funsaun Públika mós hetan karta ida husi Ministru MAPPF atu hodi halo invetigasaun ba kazu refere, ne’e’bé mak kazu ne’e daudaun ne’e iha prosesu invetigasaun no hein mós KAK ninia prosesu invetigasaun to’o prosesu final atu hatene katak, loos ou laloos ne’e ita sei haree bazeia ba invetigasaun husi KAK no KFP, dehan Komisáriu KFP ba asuntu disiplinar, Agapito da Conceição.

Wainhira suspensaun ona, signifika saláriu la la’o ona no hein invetigasaun hotu mak foin haree karik la komete buat ruma ninia saláriu sei selu fila fali. Nu’udar funsionáriu ninia saláriu la’o hela maibé suspende husi kargu, tuir Lei ne’ebé mak iha, nia tama ba prizaun liu tinan rua ba leten automátika sai husi funsionáriu, wainhira sei iha prezunsaun inosensia ninia saláriu sei la’o nafatin. No suspensaun kargu ne’e bazeia ba karta mai husi Ministru MAPPF mai Prezidente KFP hodi suspende, esplika Komisáriu.

Vizita surpreza ne’ebé ekipa Konjunta husi Komisaun Funsaun Públika (KFP), Komisaun Anti Korupsaun (KAK), Inspetoria Jeral Estadu (IGE) no Ministériu Finansas liu husi Diresaun Jeral Jestaun Patrimóniu Estadu (MF-DJJPE) hala’o ona iha semestre ida liu ba iha Ministériu lubun ida hanesan MCI, MAE, no MAPPF inklui munisípiu Ermera hala’o, iha ona relatóriu konjunta ne’ebé ekipa submete ona mai KFP hodi apura invetigasaun kontínua ba iregularidade lubun ida ne’ebé deteta durante vizita surpreza no sei enkamiña hikas ho ninia dezisaun sira atu fó sansaun tuir estatutu funsaun públika iha, no relatóriu ne’e sei hato’o mós ba Konsellu Ministru atu bele hasai dekretu lei ou rezolusaun ruma atu ministériu no instituisaun sira bele kumpri tuir labele komete iregularidade sira, esplika Komisariu KFP ba asuntu Disiplinar.

Durante vizita surpreza kuaze iha iregularidade no viola regras servisu maioria iha ministériu sira, hanesan pontualidade iha servisu fatin iha lista prezensa la tuir regras ne’ebé mak iha. Tanba iha ministériu lubun ida mak define tiha oras iha listra prezensa manual 8:00 maibé, iha finger print lahanesan tama fali 9:00, tanba ne’e KFP hasai ona ezemplu lista prezensa hodi haruka ba liñas ministeriais sira hodi tuir, ezemplu hanesan iha Komisaun Funsaun Públika rasik wainhira tama servisu dader 8:00 mak foin hakerek no asina, no sai 12:00 ou 12:15 nune’e, retóma servisu iha tempu lokraik 14:00 no sai 17:30 mak asina nune’e susesivamente, tanba ne’e KFP fó ona orientasaun ba sira atu tuir oras ne’ebé mak define ona iha lista prezensa no finger print tenke hanesan, no vizita surpreza sei la para no kontinua la’o ba ministériu no instituisaun sira, dehan Komisáriu KFP.

Husi vizita surpreza ne’ebé ekipa ba ida-idak haree ba ninia papel hanesan KFP haree liga ba iregularidade ne’ebé iha baze ba estatutu funsaun públika, KAK no IGE haree ba iregularidade krime no jeral no Ministériu Finansas Diresaun Jeral Jestaun Patrimoniu Estadu mak haree ba uzu patrimóniu estadu no veíkulu estadu ne’ebé mak sei hamutuk mós ho KFP haree ba kestaun ne’e, salienta Komisáriu.

Esplika Komisáriu KFP ne’e katak, vizita surpreza ninia efeitu mak haree ba iha ministériu lubun ida ekipa seidauk vizita ba maibé iha ministériu balun ne’ebé ami vizita ba, husi ministériu barak mak komesa kumpri ona hodi tama servisu tuir regras no pontual ona, no ikus mai komesa di’ak ona.