Comissão da Função Pública

Komisaun Funsaun Públika Kuarta-feira, 04 Agostu 2022 hala’o Serimónia asinatura Termu de Adesão ao Regime da Licença de Estudo ba funsionária Sara Correia Castro, ne’ebé sei hala’o ninia estudu mestradu iha Japaun iha área Improvment of Public Administration and Legal System, na Doshisha University.

Iha termu adezaun ne’e, Prezidente Komisaun Funsaun Públika, Faustino Cardoso Gomes lori Komisaun nia naran fó parabéns no kongratulasaun ba bolseira Sara Correia Castro, ho kategoria Téknika Profesional ho Grau-C, ne’ebé maka selesionada ba programa bolsa de estudu iha Japaun Development Scolarship-JDS.

Prezidente Faustino konsidera eventu refere, hanesan eventu dahuluk, hala’o iha kontekstu iha Komisaun Funsaun Públika ne’e la’ós foin halo kontratu maibé, nia manifestasaun ka realizasaun ne’e maka foun.

Tuir Prezidente, iha asina termu aseitasaun ne’e estuda no wainhira konklui, bolseira sei fila fali mai hodi kumpre no servisu ba Instituisaun ne’e durante tinan rua antes deside ba fali área seluk.

No rekomenda katak, ema Japaun nia movimentu lais tanba ne’e tenke ajusta aan nune’e mós hanesan dezafiu ida ne’ebé sei hasoru hanesan situasaun foun, ambiente foun, dinámiku foun no ajusta aan durante Estudu.

Hafoin Serimonia Termu de adezau bolseira Sara Correia Castro hateten, pesoalmente wainhira foti ona desizaun hodi aplika ba kualker bolsa tenke komprementidu ona katak, tenke hotu ho esforsu tomak.

Bolseira Sara Correia Castro sei estuda ba Mestradu, mestradu iha Japaun iha área Improvment of Public Administration and Legal System, na Doshisha University, ne’ebé hahú husi 18 Agostu no termina iha 18 Novembru 2024.

Partisipa no sai testamuña iha eventu ne’e Komisáriu KFP, António Freitas, komisáriu Fausto da Silva Freitas, Sekretária Ezekutiva, Maria da Costa Oliveira no diresaun nasional planeamentu kuadru pessoal iha Funsaun Públika.