Comissão da Função Pública

Prezidente no Komisárius Komisaun Funsaun Públika akompaña husi Sekretária Ezekutiva SKFP enkontru ho reprezentante Banku Mundiál iha Timor –Leste hodi ko’alia kona-ba planu Banku Mundial ninian apoiu iha setór administrasaun públika ninian ba iha peskiza tamañu forsa traballu iha administrasaun públika no ninia remunerasaun sira.

Objetivu husi reuniaun ne’e atu promove servisu hamutuk entre KFP ho Banku Mundial ba iha servisu peskiza ba setores hotu iha definisaun forsa traballu iha Funsaun Públika.

Iha reuniaun ne’e Prezidente KFP, Agostinho Letêncio de Deus aprezenta kona-ba mandatu dahaat ne’ebé mai ona ho planu reforma jestaun administrasaun públika, ne’ebé baze ba iha rezultadu diagnóstika ne’ebé KFP iha. Tuir aprezentasaun ne’e katak, haree ba tamañu forsa traballu iha funsaun públika iha tinan kotuk sa’e ba 39,380 konsidera sa’e makás, no tuir dadus atualizadu iha SIGAP FOUN iha tinan 2024 hatudu katak, 37,525 ne’e ba de’it funsionáriu permanente no ajente administrasaun públika, la inklui instituisaun estadu sira hanesan E.P, I.P,  F-FDTL no PNTL, se inklui hotu entaun total forsa traballu iha Timor sa’e ba 60 mil ital ne’ebé mak hala’o knár ba estadu ida ne’e. Tanba ne’e KFP ninia parte husu Banku Mundial ninia apoiu ba iha definisaun tamañu forsa traballu ba iha setóres ne’ebé iha.

Nune’e, reprezentante Banku Mundiál iha Timor –Leste, Bernard Harborne aseita tebes ho planu Komisaun Funsaun Públika ba iha peskiza, husi Banku Mundial nia parte sei pepara sumariu badak haruka hikas mai KFP hodi define tamañu forsa traballu hodi implementa pur etapa tuir setores ne’ebé iha.

Reuniaun ne’e hala’o iha gabinete Prezidente KFP iha Matadouro, Díli, iha kuarta-feira, (21/08/2024).