Comissão da Função Pública

Kuarta-Feira, 14 Marsu 2019 – Komisariu Komisaun Funsaun Públika liu husi Diresaun Gabinete Inspesaun no Auditoria (GIA), organiza enkontru trimestral ida inspetores no auditores Funsaun Públika ho topiku “importansia Padraun Prosedimentu Operasional ba Sustentabilidade Servisu Inspesaun no Auditoria” iha salaun  Aikurus Binani, Matadouru, Dili.

Abertura iha enkontru ba daruak ne’e loke husi Komisariu asuntu disiplinar, Dr. António Freitas ho objetivu atu defini padraun prosedimentu operasional no ajustamentu papel inspetores sira hodi garante prosesu ezekusaun orsamentu, programa no viaturas estadu iha kada ministeriu no instituisaun sira. Tamba durante ne’e  detekta katak iha ministeriu balun servisu inspesaun no auditoria sei kontrola husi diretor jeral.

Iha enkontru ne’e, Inspetor no Auditores sira rekoñese durante ne’e laiha indepedensia servisu, tamba kontrola husi diretor jeral tamba asina dokumentus avaliasaun dezempeñu.

Iha enseramentu enkontru ne’e Komisariu orienta ba Gabinete Inspesaun no Auditoria (GIA-KFP), Nelson Philomeno atu aselera no estabelese ekipa task force ida hodi hahu prepara dokumentos no proposta kona-ba integridade, imparsialidade, separasaun servisu inspesaun geral nian husi diretor jeral, atu diskute klean iha enkontru tuir mai antes aprezenta ba Premeiru Ministru.

Enkontru Trimestral ne’e partisipa másimu husi inspetores no auditores husi kada ministeriu,  Instituisaun PNTL, F-FDTL inklui instituisaun Autónomas hanesan CNE, PHDJ no KAK.