Comissão da Função Pública

DILI, 26 Marsu 2026 – Komisáriu Komisaun Funsaun Públika (KFP) ba asuntu Planeamentu Forsa Traballu, José Telo Soares Cristovão, hamutuk ho ekipa Jurídiku, hala’o reuniun kordenasaun ho Ajénsia Dezenvolvimentu Nasionál, I.P. (ADN), iha Hudi-Laran, Díli, kinta-feira ne’e.

Objetivu prinsipál husi inkontru ne’e mak atu fó esklaresemente klean konaba implementasaun Dekretu-Lei Nu. 3/2026, loron 3 Fevereiru, ne’ebé regula Rejime Jurídiku Kontratu Traballu ho Prazu Determinadu iha administrasaun públika.

Komisáriu José Telo Soares Cristovão, esplika katak kbiit umanu iha ADN kuaze eskluzivamente kompostu husi traballadór sira ho kontratu prazu determinadu (termu sertu). Dekretu-Lei foun ne’e mai atu atende nesesidade tranzitória sira ba tempu ne’ebé limitadu, hodi asegura katak prosesu kontratasaun hotu la’o tuir regulamentu estadu nian.

Komisáriu mós rekoñese katak KFP simu ona keixa balu husi funsionáriu sira relasiona ho mudansa sira ne’e. Nia husu ba parte hotu atu mantein espíritu respeita malu: “Buat hotu ita bele rezolve, importante mak tenke respeita malu no esforsu hamutuk”.

Alende ne’e, Relasiona ho kestaun orsamentu, Komisáriu fó hanoin katak asina kontratu sem kabimentu orsamentál ne’e konsidera hanesan krime. esplika husi Komisáriu Komisaun Funsaun Públika (KFP) la’ós orgaun ne’ebé foti desizaun ba orsamentu, tanba ne’e kompeténsia husi Ministériu Finansas no ministru tutela sira. KFP nia knaar mak atu asegura de’it katak lei ne’ebé Governu aprova ona ne’e ezekuta ho loloos.

Oradór mai husi Ekipa Jurídiku Komisaun Funsaun Públika (KFP), Sr. Daniel, ne’ebé halo aprezentasaun ba téknika sira, hodi esplika detallu husi Dekretu-Lei Nu. 3/2026.

Aprezentasun ne’e remata ho sesaun pergunta husu no hatan, ne’ebé fó oportunidade ba partisipante sira, inklui Direitór Ezekutivu ADN, koordenadór, enjeñeiru, no funsionáriu kontratadu sira, atu hato’o sira-nia dúvida.

Reuniaun ne’e sai hanesan pasu importante hodi asegura katak funsionáriu sira iha ADN kompreende sira-nia direitu no obrigasaun iha enkuadramentu legál foun nia laran, hodi nune’e administrasaun públika bele funsiona ho efisiente no transparente.

Partisipante mai husi Komisaun Funsaun Públika, Direitór Ezekutivu ADN, koordenadór, enjeñeiru, no funsionáriu kontratadu sira.