Comissão da Função Pública

Aileu, 21 Novembru 2025 – Komisáriu Portfóliu Disiplinár, Agapito da Conceição, hamutuk ho Inspetora Sonia da Silva Soares fó Formasaun Espesializada iha área Integridade ba Funsionáriu Públiku hosi Servisu Eskola Kooperativa (SECoop) iha munisípiu Aileu, ba funsionárius na’in 41 (Feto 17, Mane 24).

Iha mensajen Komisáriu Agapito da Conceição fó enfaze ba papel KFP atu garante profesionalizmu no asegura bem-estar funsionalizmu públiku, inklui mós prevensaun ba asédiu sexuál.

Material ne’ebé aprezenta kona-ba atendimentu públiku no integridade, baze ba Lei n.º 7/2009, 15 de Jullu,  dehan katak, funsionáriu públiku tenke halo atendimentu ho transparénsia no imparsialidade, la haree ba kor, organizasaun ka grupu, maibé uza de’it profesionalizmu tékniku. Nu’udar servidór públiku, tenke sinseru, halo atendimentu ho efisiénsia, efikásia, no efetivu. Ema hotu hosi Diresaun to’o Funsionáriu tenke servi ho onestidade, pontuál, no asiduidade, kumpre orden Superior no orientasaun hosi Dekretu Lei sira.

Alende ne’e esplika mós prosesu sira ba rekrutamentu no promosaun grau baze ba méritu pesoál, labele se’es hosi área tékniku no labele hetan intervensaun polítika, grupu, família, ka kor organizasaun. Hafoin mandatu IV, hamosu promosaun  por antiguidade ba funsionárius ne’ebé nunka promovidu iha tinan barak.

Nune’e halo mós análise ba Forsa traballu ba servidór públiku iha territóriu tomak daudaun ne’e atinje ona 70 mil, kompostu husi kazuál, ajente Administrasaun Públika, funsionáriu permanente, PNTL, no F-FDTL.

Alende ne’e materia seluk ne’ebé lori husi ekipa Provedoria dos Direitus Umanus no Justisa (PDHJ), KAK, IGE, Patrimoniu Estadu no Inspetora KFP lori material kona-ba prevensaun Asédiu Sexuál iha servisu fatin.

Formasaun espesializada ne’e taka ho mensajen hosi Reprezentante PAM Aileu, José Vicente Vila Nova, Komisáriu Agapito da Conceição, no Inspetór SECoop Gaspar Policarpo Correia, inklui fahe sertifikadu simbolikamente.