Comissão da Função Pública

Prezidente, Komisárius hamutuk Sekretariadu Komisaun Funsaun Públika organiza enkontru konvokatóriu ho direjentes no kargus xefias husi instituisaun administrasaun direta no indireta inklui Prezidente Autoridade Munisipál sira durante loron haat hahú Tersa-feira loron 30 Juñu to´o Sexta-feira loron 3 fulan  Jullu tinan 2026 iha salaun Aikurus Binani KFP Matadoru Dili.

Prezidente Komisaun Funsaun Públika Agostinho Letêncio de Deus esplika katak enkontru ida ne’e, enkontru Konsultasaun nian, base ba orientasaun husi Sua Exelencia Primeiru Ministru Kay Rala Xanana Gusmão nian, ne’ebé husu atu Komisaun Funsaun Públika tur hamutuk ho dirijente husi instituisaun administrasaun direta no indireta sira hodi halo diskusaun, halibur opiniaun, sujestaun kona-ba dokumentus Polítika Rejime Karreira Únika Administrasaun Públika nian,  ne’ebé Komisaun produz, liga ba  Polítika  reforma administrasaun públika.

Prezidente hateten, konsultasaun ne’e hotu, sei kontinua ho semináriu nasional ida, ne’ebé sei lidera husi Primeiru-Ministru  Kay Rala Xanana Gusmão no Ministra Finansa rasik, hodi akumula fila-fali ideia sira husi konsultasaun nian ne’e, no husi rezultadu seminário ne’e maka sei apresenta ba Konsellu Ministru hodi autoriza ba Parlamentu Nasional atu deskute, hodi define mós karreira sira Administrasaun Públika nian, define renumerasaun sira, define saláriu no define sistema sira iha Administrasaun Públika.

Autoridade KFP ne’e realsa tan katak, liu husi enkontru konvokatóriu ne’e fó tempu barak liu ba direjentes no kargus xefia no Prezidente Autoridade Munisipál sira ida-idak atu fó opiniaun, sujestaun ba asuntu importante sira kona-ba karreira, renumerasaun, sistema pagamentu sira, tamañu forsa traballu  no polítika ba kapasitasaun. 

Enkontru konvokatóriu baze mós ba IX Governu Konstitusional nia Polítika reforma administrasaun Públika, liga mós ba programa Komisaun Funsaun Públika nian hamutuk komponente 18, no komponente reforma  balun presiza iha diskusaun adekuadu no hetan insumu husi liñas ministeriais sira, atu halo melloramentu di’ak liu tan, antes lori ba aprezenta iha enkontru Konsellu Ministru, atu hadi’ak futuru funsionáriu públiku nian, hadi’ak konseptu sira sai di’ak liu tan, hodi kontribui ba Polítika futuru funsionário sira tomak nian.

Iha tinan 2025 no 2026 tuir despaxu número 2/GPM/I/2025, grupu traballu KFP no Ministériu Finansa realiza estudu ba asuntu  tamañu forsa traballu, atualizasaun sistema Karreira, atualizasaun remunerasaun ba trabalhador sira iha administrasaun públika, analiza suplementu remuneratóriu sira, analiza orsamentu ba formasaun, kapasitasaun rekursu umanu no  Sistema Integradu Jestaun Administrasaun Públika – Foun (SIGAP-Foun) ho GRP-freebalance.

Husi rezultadu estudu hamosu Dokumentu Polítika Rejime Karreira Únika Administasaun Públika Timor-Leste nian, ne’ebé KFP distribui ona ba liñas ministeriais no autoridade Munisipál sira. Komisaun mós halo  konsolidasaun no diskusaun ho direjentes no kargus xefias husi instituisaun administrasaun direta no indireta sira, inklui Prezidente Autoridade sira hodi haree ba nia estratégia no mekanizmu implementasaun Polítika Rejime Karreira Únika.