Comissão da Função Pública

16 Jullu 2020 – Prezidente Komisaun Funsaun Públika hasoru malu ho S.E Vise Ministru Interior tur hamutuk hodi aborda, haree kestaun sira ne’ebé mak ligadu ho ministeriu interior ninian servisu.

“Ohin ami tur hamutuk hodi aborda kestaun hirak ida ne’ebé mak ligadu ho kestaun prinsipal rua, ida kona-ba servisu emigrasaun ninian, liu-liu ninia estatutu rejime espesial mak to’o ohin loron seidauk iha klareza, ita tenke klaru iha ne’eba la’os iha purgatoriu hela deit. Servisu ne’e ba PNTL ka ba  Ministériu Interior ninian tenke klaru, tanba ne’e ohin ami alerta ba malu oinsá atu situasaun ne’e resolve tiha, ohin ami rona komprimisiu husi Vise Ministru no asesor sira tomak atu oinsá mak hakat liu situasaun ida ne’e sai nudar aposta ida ba rezultadu servisu Governu ne’e nian. Ami mos sei komunika ho PNTL, hamutuk ho Minitériu Interior oinsá atu resolve tiha situasaun ida ne’e,” esplika Prezidente KFP Faustino Cardoso Gomes hafoin enkontru ho Vise Ministru Interior, António Armindo.

Alende ne’e aborda mós kestaun seluk liga ho kargus diresaun xefia Ministériu Interior nian.

“Kestaun seluk kona-ba kargus diresaun xefia, kestaun ne’e laos ema ida nian, maibé tenke la’o tuir lei, prosedimentus, asegura prinsipiu dignidade, kontribui ba dezenvolvimentu Funsaun Públika ninia, asegura prinsipiu méritukrasia, legalidade, nebe ami partilla regras sira ne’e ba malu oinsá atu revitaliza kargus diresaun iha Ministériu Interior ninia hodi nune’e bele ajuda implementa polítika no orientasaun ne’ebé mak VIII Governu hatur tiha ona atu alkansa” akresenta Prezidente KFP.

Enkontru ne’e espesie enkontru kordenasaun, komunikasaun ida oinsá hamutuk hakat liu tiha obstakulu sira ne’ebé mak durante ne’e atu nunee bele asegura diak liu tan kualidade instituisaun no mós dezempeñu hodi alkansa objetivu.