Comissão da Função Pública

Sesta-feira, 5 Dezembru 2025, Komisária Komisaun Funsaun Públika (KFP) Anita Tavares Ribeiro de Jesus partisipa iha atividade Divulgasaun Plataforma Asaun Feto Timor-Leste 2025-2029 ne’ebé organiza husi Rede Feto Timor-Leste (RFTL) no Sekretaria Estadu ba Igualidade (SEI) iha Hotel Timor.

Prezidente Konsellu Diretiva RFTL, Zelia Fernandes, apresia SEI tanba Platforma Asaun Feto (PAF) ne’e aprezenta ona no entrega direta ba Primeiru Ministru, hodi sai kompromisu Nasionál ba igualidade jéneru, PAF ne’e agora sai baze ba polítika no programa Governu oin mai.

Objetivu husi atividade ne’e importante atu kompartilhla rezultadu Kongresu Nasionál Feto ne’ebé aprova tiha ona PAF. Divulgasaun ne’e, hafoin realiza iha nível munisipál no rejionál, konta ho partisipasaun husi kargu diresaun no xefia husi linhas ministeriais no instituisaun relevante.

Nune’e, Sekretária Estadu Igualidade (SEI), Elvina Sousa Carvalho, apresia RFTL tanba konsege halibur feto sira hodi rona sira-nia aspirasaun.

SEI destaka progresu bazeia ba rezolusaun PAF, hanesan Revisaun ba Lei Kontra Violénsia Doméstika: Ministériu Justisa no SEI besik finaliza ona prosesu diskusaun, asediu seksual ne’ebé kontinua akontese iha eskola sira, no violénsia bazeia ba jéneru. Nune’e Reforma ba Lei Traballadór Doméstiku hamutuk ho SEFOPE ita realiza, no Governu komprometidu atu buka meiu hodi kriminaliza insestu.

Entretantu, Komisária Anita hateten KFP nia mandatu IV atu reforma administrasaun públika inklui ona kestaun sira ne’ebé hasa’e husi PAF, hanesan, Bolsa Estudu ba funsionáriu públiku,kriasaun sistema rekrutamentu, formasaun karáter ba funsionáriu foun. Kona-ba Violénsia bazeia ba Jéneru (VbJ), KFP kontinua halo diseminasaun prevensaun no kria meiu atu simu keixa husi vítima sira liuhusi Chat Bot Rosa.

Partisipantes ne’ebé partisipa iha atividade ne’e mak hanesan Komisáriu CAC, Reprezentante PNTL, Diretór Jerál no Nasionál, organizasaun sosiedade sivíl (hanesan CHEGA, PDHJ) no fasilitadór husi RFTL.