Comissão da Função Pública

Komisaun Funsaun Públika hamutuk ho Ministériu Agrikultura Pekuaria Peska no Floresta fo tomada pose ba Kargu Xefias MAPPF hamutuk na’in 182, ne’ebé hala’o iha Kinta-feira, 09 Jullu 2026.

Iha diskursu husi Komisáriu Porfóliu Planeamentu Forsa Traballu José Telo Soares Cristóvão hatete, kargu ne’e la’ós sai priviléjiu ne’e hanesan oportunidade ba funsionárius hotu atu serví Estadu. Nomeasaun substituisaun ne’e la signifika fulan 6 atu hasai ita-boot sira, maibé servisu ne’ebé la tuir regras no desizaun Ministru no Sekretariu Estadu na’in tolu iha kompeténsia atu hakotu nomeasaun. MAPPF nia susesu mai husi ita-boot sira-nia servisu makaas, tan ne’e, KFP husu atu Kargu Diresaun no Xefias sira atu uza konfiansa ida ne’e ho di’ak hodi hatudu dezempeñu ba iha servisu sira, dehan Komisáriu José Telo Soares Cristóvão.

Sekretáriu Estadu Pekuária, José Vieira de Araújo husu ba kargu diresaun no xefias atu avante iha servisu lor-loron nian, husu ba funsionárius hotu hatudu dezempeñu servisu tuir matenek, esperiénsia no maturidade ne’ebé ita-boot sira iha.

Sekretáriu Estadu Florestas, Fernandinho Vieira akresenta, kada tinan ida iha tomada pose ba dala-rua, ho objetivu atu fó oportunidade funsionárius hotu atu bele fó kontribuisaun no dedikasaun servisu ba iha kargu xefias iha MAPPF, posizaun ne’ebé tutela ba iha ida-idak ninia kabás ne’e sai hanesan responsabilidade, atu bele utiliza ho didi’ak atu servisu Estadu no Nasaun liu-liu ba Povu doben liu husi komprimisiu juramentu nian.

Sekretáriu Estadu Peskas, Domingos da Conceição dos Santos ne’ebé reprezenta Ministru MAPPF destaka, normalmente, mudansa hirak ne’e akontese maibe la signifika permanente, sirkulasaun/rotasaun ne’e hanesan obrigasaun instituisional bazeia ba observasaun, monitorizasaun ba kada individu sira ne’ebé mak kontribui sira-nia kapasidade profesional iha fatin ne’ebé ezerse ba. Mudansa hirak ne’e mai husi MAPPF la’ós husi KFP, Supriores MAPPF nian mak halo observasaun ba ita-boot sira-nia dezempeñu ne’ebé mak kontibui liu husi halo ezersisiu internu tuir potensialidade ita-boot no la inklui ho emosaun iha laran, dehan reprezentante Ministru MAPPF.