Comissão da Função Pública

10 Jullu 2021, Komisaun Funsaun Públika hamutuk ho ekipa organizadora Ministeriu Saúde ba komemorasaun Loron Nasional Funsaun Públika ba dahituk hala’o atividade marcha saudável (la’o saudável).Marcha ne’e fo importansia ba ema ida-idak oinsa atu hare ba saúde ida-idak ninian ho sériu hahú husi nia an.“Marcha ne’e bele fo alerta, fo hanoin kona-ba importansia ema ida-idak atu hare saúde ho sériu hahú husi nia an, ida ne’e oinsá atu hala’o atividade ida ne’ebé mak fo saúde di’ak ba ita, maske okupadu ho ida-idak nia servisu, maibé buka nafatin tempu atu halo exersisiu oan ida atu mantein saúde, sa tan iha situsaun covid-19 nian, ho maneira ne’e bele mantein saúde liu husi atividade exersisiu sira. Ida ne’e mak realidade moris agora gosta ka lagosta ita tenke moris hamutuk ona ho covid-19, tanba ne’e ita ida-idak buka ita nia saúde, atu bele iha imunidade di’ak hasoru pandemia ida ne’e,” esplika Prezidente KFP, Faustino Cardoso Gomes ba jornalista sira iha Lecidere. Komemorasaun loron nasional Funsaun Públika ne’e hahú iha II mandatu mai, hamosu polítika ida ne’e liu husi rezolusaun governu ida hodi hamosu loron nasional Funsaun Públika iha loron 15 Jullu, ne’ebé tinan-tinan hala’o no funsionáriu públiku sira nu’udar mákina estadu hodi serví, presta servisu ba komunidade no povu ba moris di’ak.Atividade komemorasaun ne’e kompostu husi konsulta jeral ba públiku no komunidade sira ne’ebé mak lansa ona iha sentru Formoza ida ne’e hala’o iha nasional tantu munisipiu sira ne’ebé mak realiza hanesan iha Ermera, Viqueque, Manufahi no fatin seluk tan ne’ebé mak fo atendimentu ba públiku hanesan baibain.Kulmine ba komemorasaun ne’e sei monu iha loron 15 Jullu semana oin, ne’ebé funsionariu sira sei halibur hamutuk hodi rona mensajen husi Primeiru Ministru no Prezidente Repúblika ba komemora loron importansia ida ne’e.