Comissão da Função Pública

Diseminasaun ida ne’e realiza husi ekipa integradu kompostu husi KFP, PDHJ, IGE, MSSI, SEII no MEJD.

Objetivu husi diseminasaun ida ne’e hodi sensibiliza liu tan informasaun sira kona-ba instituisaun ida-idak nia kompeténsia.

Lia hirak ne’e husi komisariu KFP asuntu disiplinar, Fausto Freitas da Silva iha diskursu, agradese ba autoridade lokal iha postu administrativu Tursicai, munisípiu Manufahi ne’ebé hatudu disponibilidade no vontade hodi realiza atividade diseminsaun ne’e.

Iha Komisáriu Disiplinar ninia diskursu ne’e foka liu ba prosedimentu administrativu no displinar. No husu mós ba partisipante sira aproveita ho di’ak materia sira ne’ebé mak ita bo’ot sei hetan durante loron rua ne’e. No partisipa masimu ho ativu iha atividade ida ne’e too nia rohan.

Komisáriu mós nafatin enkoraja funsionáriu sira hotu, atu hatoo keisa ruma ba KFP, KAK, PDHJ no instituisaun relevante sira ne’ebé bele fó tulun no fó solusaun ba problema sira ne’ebé hasoru iha servisu fatin. Liu-liu hahalok sira hanesan infrasan disiplinar sira hanesan abandona servisu, mal administrasaun, korupsaun, asédiu seksual, no seluk tan.

Iha tempu hanesan Administador postu Tursicai mós adgradese tebes ba komisariu KFP ho nia ekipa tomak hiit an mai too iha fatin simples ida ne’e maske estrada ladun furak maibé, tanba kna’ar nu’udar funsionáriu atu serbí, hanesan servidor estadu tenke kumpri direitu no dever.

Adianta Komisáriu Disiplinar atu nafatin servisu ho profisional, transparensia, insparsial no mós servisu hamutuk ho aten brani hodi identifika no hatoo keisa sira karik, iha iregularidade ruma ne’ebé mak mosu iha instituisaun ne’ebé ita haknar an ba. Ida ne’e hanesan kontribuisaun ida ne’ebé ita halo hodi trava korupsaun, mellora profisionalizmu hodi kontribui ba boa governasaun.

Iha matéria aprezentasaun ne’e orador sira aprezenta kona-ba direitu no dever,  ba funsionáriu públiku no Ajente Administrasaun Públika orador husi KFP, PDHJ nia parte aprezenta kona-ba Boa governasaun no papel PDHJ nian, husi Ministériu Finansas – diresaun Patrimoniu Estadu aprezenta kona-ba prosesu, regras no prosedimentu jestaun patrimoniu Estadu, husi IJE kona-ba Utilizasaun Rekursus Estadus,  SEII Aprezenta matéria violensia ba Jeneru.

Iha tempu tuir mai ekipa KFP kontinua aprezenta kona-ba prosesu disiplinar, rejime promosaun ba rejime jeral iha administrasaun públika, matéria pensaun, reforma no eventualidade no lei seguransa sosial aprezenta husi INSS.

Enkuantu iha diseminasaun ne’e partisipante sira levanta kestoens sira ligadu ho seguransa sosial, uzu patrimoniu estadu, eskalaun, promosaun no kestoens ligadu sira seluk kona-ba jestaun rekursu umanus.

Fin husi atividade ne’e fahe mós sertifikadu ba partisipante sira hamutuk 72 kompostu professór sira, edukasaun, saúde, MAE, MOP no ajente administrasaun públika.

Diseminasaun ne’e realiza iha salaun Administrativu Postu Tursicai, Munisipiu Manufahi durante loron rua (28-29 Setembru 2022).