Comissão da Função Pública

Prezidente Komisaun Funsaun Públika, Agostinho Letêncio de Deus partilla kona-ba REFORMA ADMINISTRASAUN PÚBLIKA PRIORIDADE GOVERNU KONSTITUSIONAL DASIA iha Meet the press ne’ebé organiza husi Sekretariu Estadu Komunikasaun Sosial ne’ebé konvida media estatal RTTL E.P, Tatoli I.P no media nasionál sira seluk iha sesta-feira ne’e, (19 jullu 2024) iha salaun Ministéiru Transporte no Komunikasaun (MTK) Merkadu Lama.

Objetivu husi programa nu’udar meius ida hodi hato’o progressu no dezafiu servisu Governu konstitusional dasia nian ba públiku. Alende ne’e partilla mós prioridade IV mandatu Komisaun Funsaun Públika nian liu husi reforma adminsitrasaun públika.

Iha aprezentasaun kontekstu reforma administrasaun públika ne’e Prezidente KFP, Agostinho Letêncio de Deus esplika katak, reforma administrasaun públika ne’e atu halo melloramentu saida mak iha ita presiza hadiak, ajusta, haree ba kondisoens administrasaun públika nian, hodi responde nafatin ba ezijensia atual sira. Polítika reforma iha mundu tomak sempre mai ho kada vizaun hodi mellora sistema sira atu responde nafatin ba ezijensia públiku nian, nune’e IX governu konstitusional orienta ba KFP atu halo polítika reforma administrasaun públika ne’ebé mak responsabiliza ba iha rekursu umanus iha nivel administrasaun públika nian.

Agostinho Letêncio de Deus esplika katak, KFP hamutuk ho PROSIVU hato’o atividade diganóstiku atu buka hatene problema saida mak eziste iha adminsitrasaun públika no problema saida mak iha publiku sira nia hanoin. Husi problema hirak ne’ebé iha KFP halo diagnóstiku no baze dadus iha SIGAP hodi buka halo definisaun radio forsa traballu tuir kada setór hodi bele koresponde ba setór sira ne’ebé ba dezenvolvimentu rekursu umanus ida adekuadu iha Administrasaun Públika.

Iha prosesu diagnóstika ne’e deteta problema sira ne’ebé nota katak, seidauk iha forsa traballu ida ne’ebé tuir tamañu administrasaun públika nian, tanba ne’e presiza define uluk rasio ba kada setór hodi planeia, analize no define forsa traballu ida di’ak ba futuru. Liu husi diagnóstika ne’e mak ita bele hanoin mós polítika reforma ba adminsitrasaun públika ein jeral hahú husi rekrutamentu to’o reforma.

Prezidente KFP sita, relasiona ho polítika reforma ne’e mak KFP sei buka rezolve uluk reforma ba idade 60 anos, hafoin ne’e bele hanoin oinsá atu halo planu rekrutamentu ba iha ajente no kazuais sira ne’ebé mak presta servisu durante tempu baruk atu rezolve problema sira ne’e. Alende ne’e haree mós ba kareira foun iha administrasaun públika, haree ba kestaun formasaun karákter funsionáriu sira, formasaun no kapasitasaun ba área téknika no profisional ida-idak ninian, kontinua mellora no hasa’e koñesimentu liu husi bolsa estudu ba funsionáriu sira.

Nia mós destaka katak, tinan barak ona to’o agora funsionáriu rihun atus haat resin mak servisu tinan barak ona maibé seidauk hetan promosaun, nune’e iha tempu besik KFP sei hato’o proposta ba Konsellu Ministru hodi halo promosaun ba funsionáriu antiguidade. Tanba haree ba tendensia lubun ida ema ne’ebé servisu tinan barak ho grau nafatin, ema ne’ebé rekrutadu ikus mai grau boot liu sira entaun desmotiva tiha funsionáriu tuan sira hodi presta servisu ho di’ak.

Nia mós hatan ba jornalista sira katak, KFP IV mandatu sei implementa 18 prioridades ne’ebé define tiha ona, ida mak kareira foun ne’ebé define husi level 1-50 tuir ida-idak ninia grau akademika tuir área profisionais ida-idak ninian, Komisaun sei adopta rejime estrutural no rejime profisional, uniformiza no harmoniza nomeasaun sira ba kargus xefias iha rejime jeral no espesial,

Problema ida mak iha funsionariu lubuk ida konsidera hetan nomeasaun politika hodi sai membru governu. Ho situasaun ne’e wainhira sira asume tiha kargu politiku fila hikas ba grau anterior, entaun ba oin komisaun iha hanoin ida presiza konsidera atu apresia ba sira nia esperensia nebe iha, governasaun eletrónika iha funsaun públika ba transformasaun digital, no mós preparasaun ba ASEAN nian ne’ebé  KFP mós hola parte iha membru ASEAN Socio-Cultural Community (ASCC) ba iha setor funsaun públika ninian.

Programa meet the press ne’e direta husi Sekretariu Estadu Komunikasaun Sosial, no hetan akompañamentu Komisárius KFP, Sekretária Ezekutiva, Inspetora no Diretores sira inklui media sira.