Comissão da Função Pública

Komisaun Funsaun Públika (KFP), Institutu Defeza Nasional (IDN) no Instituisaun  Nasional Administrasaun Públika (INAP) simu orientasaun husi S.Exa Primeiru Ministru hodi define kurikulu ida atu kobre ba iha materia sira iha âmbitu atu hametin liu tan sentidu no sensu estadu ba funsionáriu públiku sira. Orientasaun ne’e simu husi Exa. PM iha  enkontru ne’ebé realiza iha Palasiu Governu (05/06/2020)

Durante ne’e Komisaun mós iha polítika formasaun ne’ebé servisu hamutuk ho INAP nudar entidade implementadora hodi fo formasaun ba funsionáriu sira iha area jeral sira nomós area espesífika sira seluk.

Klaru katak, formasaun durante ne’e  hare deit ba hasa’e kapasidade téknika, profisional, maibé ba oin ita buka oinsa atu akresenta tan komponente importante sira seluk bazeia ba orientasaun polítika husi S.Exa Primeiru Ministru ninian katak, oinsa atu hasa’e no hametin liu tan sensu no sentidu estadu iha nivel funsaun públika ninian dehan Prezidente KFP, Faustino Cardoso Gomes.

Formasaun ne’e liu-liu ba sira ne’ebé mak assume kargus no mós ba sira ne’ebé foin tama, atu iha komponente ida ba formasaun karakter funsionariu públiku sira nian ho materia ne’ebé ligadu ho patriotizmu, nasionalizmu aptidaun fizika, aptidaun moral, aptidaun polítika hotu dala ida, komprende saida mak sidadania, saida mak hierarkia akresenta Prezidente KFP.

Iha âmbitu ida ne’e KFP sei servisu hamutuk ho no Instituisaun  Nasional Administrasaun Públika (INAP) no mós ho Institutu Defeza Nasional (IDN) hodi kontinua tur hamutuk hodi aborda materia sira ne’ebé ligadu ba sensu no sentidu patriotizmu no nasionalizmu.

Formasaun ne’e sei  implementa iha tinan 2021 wainhira orsamentu la’o normal.