Comissão da Função Pública

Prezidente Komisaun Funsaun Públika, Faustino Cardoso Gomes lidera ekipa avansada tékniku sira kompostu husi SKFP, MACLN, MTCI no MAE no akompaña husi eis eskoltu saudozu Nicolao Lobato, Tonizé, administrador postu Turiscai hodi ba identifika terenu ba atividade jornada la’o tuir ain fatin em memória ba saudozu Nicolao dos Reis Lobato ba ninia última jornada ne’ebé sei hahú husi postu Turiscai ba suku Fatucalo hodi tun ba Merlau tesik fali ba Bukailala no kontinua ba Wermatan Aikua hodi tun ba tama Fatu Ruin tun ba mota Malidaet.  Nune’e kontinua husi mota Malidaet ba foho Ailiis, sae ba Bedois Erhoo, ba Taroke, tesik ba aldeia Raimerhei, suku Faturasa postu Remexio nian, iha ne’ebá mota Manaun hodi sae ba Aikurus, ida ne’e mak pontu partida identifikasaun terenu ba jornada ne’ebé sei hala’o iha tempu besik.

Ba atividade jornada ne’e sei hetan akompañamentu husi matadalan Laurentino F.Soares no matadan seluk ne’ebé bele hatene istória rezistensia hodi nune’e bele partilla informasaun ba funsionáriu sira wainhira jornada ne’e realiza.

Durante identifikasaun ba terenu, ekipa ne’e mós sei halo dialogu no hasoru malu ho veteranus balun, funsionáriu sira, OPS, Polísia postu Turiscai no komunidade  iha suku Fatucalo hodi rona mós sira nia aspirasaun liga ho edukasaun hanesan eskola ne’ebé iha sala 3 de’it ho total estudante 135 ne’ebé mak tuir kurikulu foun husi Ministériu Edukasaun hanorin oras 2 iha aula ida professor hanorin estudante primeiru ano no segundu ano iha sala ida ho tempu hanesan, nune’e mós ba terceiro ano no quarto ano to’o quinto ano no xesto ano  ho total professor nain 5 kompostu husi  professor permanente nain 2, kontratadu nain 2, voluntariu nain 1. Tanba ne’e husu ba parte kompente atu halo rekrutamentu ba professor sira hodi bele reforsa ba iha eskola Ensinu Báziku Filial Fatucalo postu administrative Turiscai.

Alende ne’e komunidade mós hato’o katak, seidauk iha asesu ba eletrisidade, bee, estrada, saúde no edukasaun ne’ebé mak efetivu ba labarik sira.

Enkuantu xefe suku Fatucalo, xefe aldeia sira no komunidade sira kontente tebes tanba bele hetan vizita husi Prezidente KFP ho nia ekipa avansada hodi bele partilla informasaun ba malu no pontu objetivu importante liga ho jornada la’o tuir ain fatin ba saudozu sira.

Tuir pontu identifikasaun sira ne’eb’e Prezidente KFP ho nia ekipa avansada define ona no mós ba matadan sei iha nain 3 mak akompaña hodi haktuir instória rezistensia ninian iha momentu ne’ebá, no tuir kalendáriu jornada sei hala’o hafoin 15 jullu, tanba presiza halo sinalizasaun no monumentu ida ba iha Prezidensia nian iha Ermori ne’ebé mak sei kolabora hamutuk ho Centro Nacional Chega (CNC) hodi halo monumentu.

Identifikasaun terenu ne’e ekipa hala’o iha loron sesta feira, 24 Juñu 2022 hahú husi Turiscai ba Fatucalo.