Comissão da Função Pública

Prezidente Komisaun Funsaun Públika, Agostinho Letêncio de Deus ho Sekretaria Ezekutiva, Maria da Costa Oliveira hamutuk ho Diresaun Rekrutamentu no Dezenvolvimentu Kareira iha Funsaun Públika Diretora, Marcelina Irene dos Santos Mesquita enkontru ho diretores jerais no nasionais husi liñas Miniteriais no Instituisaun Governu hodi haree ba preparasaun sira ba promosaun jeral ba kareira jeral iha administrasaun públika ba tinan 2024 nian ne’ebé hala’o iha 02 Outubru 2024 iha salaun Aikurus Binani.

Objetivu prinsipal ba enkontru ne’e atu informa ba liñas ministeriais hotu ligadu ba teste promosaun grau ba funsionarius públikus iha tinan ne’e ba definisaun materia ne’ebé sei fahe ba kada setoriais nian.

Prezidente KFP esplika ba iha tékniku sira kona-ba formatu teste promosaun grau iha tinan ne’e iha mudansa oituan ba materia teste ne’ebé sei define por setoriais, ne’ebé sei hahú ho setór tolu hanesan ekonomia, sosial, administrasaun no finansas inklui materia téknikus nian, ne’ebé sei implementa iha promosaun ba tinan ne’e.

KFP hato’o ona mós proposta ida hodi propoin mós antiguidade servisu funsionárius nian ba iha Konsellu Ministrus aprova ona, maibé seidauk iha dekretu lei ida atu regula ba iha implementasaun ne’e, maibé prosesu la’o daudaun ona, esplika Prezidente KFP.

Autoridade Funsaun Públika ne’e husu ba funsionárius públikus hotu atu mai partisipa teste promosaun grau iha fulan oin.

Iha parte seluk Prezidente KFP toka mós proposta reforma obrigatóriu ba idade 60 ho 65 iha Konsellu MINistru aprova ona enkamiña ona ba iha Parlamentu Nasionál.

Tuir komunikadu imprensa iha 25 setembru 2024 ne’ebé fó sai ligadu ba iha rezolusaun promosaun ba rejime jeral ba tinan 2024 ne’ebé aprova husi Konsellu Ministru ba vagas 817 ho kuota 10 pursentu ba husi totál kada grau, hanesan ba grau G ba F totál vagas 77, grau F ba E totál vagas 149, grau E ba D ho totál vagas 234, grau D ba C ho totál vagas 188. Entretantu ba kategoria superior ho grau C ba B vagas hamutuk 122 no grau B ba A totál vagas hamutuk 47.

Enkuantu, ba materia promosaun ninian sei kobre iha área sira hanesan ekonomia, sosial, administrasaun no finansas, tékniku enjenaria, agrikultura, informátika, tékniku konstrusaun sivil, arkitetura, transporte no komunikasaun.