Comissão da Função Pública

Sekretaria Ezekutiva Sekretariadu Komisaun Funsaun Públika, Maria de Jesus Sarmento sai orador hodi koa’lia materia kona-ba “Papel Komisaun Funsaun Públika” ba partisipantes formasaun indusaun jeral segunda faze, ne’ebé hala’o (16/07), iha Institutu Nasional Administrasaun Públika (INAP), Comoro, Dili.

Durante aprezentasaun  Sekretaria Ezekutiva Maria de Jesus Sarmento koa’lia liu kona-ba oinsa servisu administrasaun no prinsipiu administrasaun públika ne’ebé konsagra iha Konstituisaun Repúblika, prinsipiu funsaun públika, kultura legalidade funsaun públika, relasaun administrasaun públika ho sidadaun, direitu, deveres jerais no espesiais funcionarius públikus,  no koa’lia mós kona-ba kompetensia Komisaun Funsaun Públika.

Maria de Jesus Sarmento subliña, nu’udar funsionáriu provatóriu presija servisu ho integridade, responsabilidade, loyalidade ba supeiror sira.

Iha sesaun diskusaun funsionáriu sira husu kona-ba direitus overtime ne’ebé la hanesan rejime espesial, avaliasaun dezempeñu, oportunidade formasaun, direitus ba promosaun, no direitu ba lisensa anual.

Hatan ba preokupasaun hirak ne’e Sekretaria Ezekutiva Maria de Jesus hateten direitus hirak ne’e lei no dekretu garante tamba ne’e pesoal ida-idak ne’ebé senti direitu viola, presija halo kontaktu ba diresaun rekursus umanos Ministériu nian atu buka solusaun.

Programa indusaun ba II faze ne’e hala’o durante semana rua (8 Jullu – 19 Jullu 2019) ne’ebé partispa iha formasaun ne’e funsinariu husi Ministériu Saúde hamutuk ema nain 48 kompostu husi feto nain 27 no mane nain 21.