Comissão da Função Pública

Iha reuniaun trimestral ba inspetores no auditores husi liñas ministeriais ne’ebé organiza husi MDRHC hamutuk ho KFP no IGE hodi partilla servisu inpestoria no auditoria husi liñas ministeriais sira.

Iha reuniaun abertura ne’e ofisialmente husi Vise Primeiru Ministru ba asuntu sosial, Ministru Dezenvolvimentu Rural Habitasaun Komunitaria hanesan Primeiru Ministru Interinu, Mariano Assanami Sabino hateten ba auditores, inspetores sira importante kaer metin prinsipiu ba iha funsionamentu estadu nian hodi hala’o knár ho didiak.

Vise PM husu atu ministériu ida-idak iha inspetor hodi haree ba iha funsionamentu institusional ba iha utilizasaun patrimoniu estadu, orsamentu estadu, tanba ne’e tenke kumpri. Ho ezistensia KAK, IGE atu tau matan hodi antisipa, halo preventiva no kurativa wainhira iha korupsaun, halo investigasaun klean envia ba Ministeriu Públiku, atu transforma Governasaun di’ak mak hamosu mós PDHJ atu haree ba direitus umanus no boa Governasaun.

Iha intervensaun Komisáriu KFP Portefóliu Disiplinar, Agapito da Conceição hateten, iha enkontru trimestral entre inspetores no auditores asume papel esensial tebes iha prosesu kontrusaun estadu no dezenvolvimentu instituisaun sira.

Tuir obervasaun no preokupasaun públiku ne’ebé levanta ligadu ba servisu Governu nian seidauk másimu, nune’e Governu sei garantia seriedade no kualidade ho responsabilidade ne’ebé mak durante ne’e enfrenta iha konstrusaun estadu husi inspetores iha liñas ministeriais hodi mellora servisu ne’ebé mak ladún di’ak atu kontinuan hadia ba oin, esplika Komisáriu KFP.

Entretantu, Vise Primeiru Ministru husu, atu hatutan  mehi eroi sira nian hodi dezenvolve rai ida ne’e hasoru situasaun difisil, hodi rezolve tuir matenek ne’ebé iha.

Iha forum diskusaun ne’e husi téknikus sira levanta kona-ba auditoria, formasaun ba tékniku profisional no finanseiru ba auditoria sira ladún efetivu tanba formasaun anterior la enkaisa auditores maibé, enkaisa mós funsionarius kontratadus no kazuais sira ne’ebé la servisu ba iha área refere, tanba ne’e husu atu haree fila fali hodi hadia ba oin, kapasitasaun kontinua ba iha inspetores no auditores sira hodi mellora ba oin, levanta mós kona-ba hamosu estatutu ba servisus inspesaun no auditoria hodi uniformiza iha instituisaun estadu nian.

Iha reuniaun ne’e partisipa mós husi PNTL, F-FDTL, inspetores no auditores husi liñas ministeriais, instituisaun indireta no ajensias sira.

Reuniaun ne’e hala’o durante loron rua, (14-15 abríl 2025) iha salaun Kay Rala Xanana Gusmão, Ministériu Finansas, Aitarak Laran, Díli.