Comissão da Função Pública

Prosedimentus no Regras maka wainhira Funsionáriu feto ka mane tama maternidade, paternidade, enfrenta moras, subsídiu de morte, benefisiáriu sira no halo mudansa husi Instituisaun ida ba Instituisaun seluk, inklui trata dokumentus seluk kompete ba Seguransa Sosial.

Ho razaun hirak ne’e sai preokupasaun boot husi Prezidente Komisaun Funsaun Públika, Kuarta-feira, 20 Janeiru 2023,  konvida Prezidente Instituto Nasional Seguransa Sosial, Diretora Ezekutiva ho nia ekipa hodi partilla informasaun ne’e, oinsá fó informasaun klaru ba funsionáriu sira,  tanba to’o agora benefisiáriu sira seidauk entende didiak prosesu sira.

Iha enkontru, Prezidente Komisaun Funsaun Públika, Faustino Cardoso Gomes hato’o katak, bazeia ba balansu sira balun, Komisaun halo ona kona-ba kestaun reforma, pensaun, seguransa sosial ne’ebé ezije duni nível instituisaun kompetente iha situasaun refere hodi halo balansu li-liu efisiênsia, efikásia, implementasaun  seguransa sosial iha kontekstu Funsionáriu Públiku nian.

Tuir Prezidente, katak, polítika seguransa sosial ne’ebé maka iha ne’e, abranje ba setór públiku no mós ba setór privadu sira. Iha âmbitu aplikasaun ne’e ba forsa traballu hotu, ba funsionárius permanentes, Ajente Administrasaun Públika no kontratadus inklui mobilidade forsa traballu tuir situasaun ida-idak nian.

Prezidente Institutu Nasional Saguransa Sosial (INSS), Longuinhos Armando Leto, konsidera informasaun husi Prezidente Komisaun importante no pertinente tanba oras ne’e INSS hasoru, maske foin hamrik tinan 3 ba kotuk.

Prezidente subliña, atu mellora no implementa prosesu hodi atende traballador, sira nesesita tebes informasaun husi Funsaun Públika, tanba tuir prosedimentu funsionária isin rua sira antes partu, fulan ida sira prenxe ona formuláriu mas pelu kontráriu sira prenxe formuláriu hafoin partu inklui mós morte, loloos família trata dokumentus durante fulan tolu maibé, realidade ne’ebé iha, família trata fali depois fulan tolu wainhira fnsionáriu mate, nune’e benefisiáriu sei lá hetan subsidiu morte nian.

Enkuantu Diretora Ezekutiva INSS, Aida Maria S. Mota hateten, wainhira funsionáriu ka traballador empreza husu lisensa, rezigna aan, mudansa husi públiku ba privadu tenke informa ba INSS hodi iha koñesimentu atu nune’e bele konta nafatin kareira kontributiva.

Nune’e iha tempu hanesan Komisária Maria de Jesus Sarmento ne’ebé trata asuntu ba Finansas, Baze Dadus, Pensaun no Reforma, no Protokolu no Komunikasaun kompromete katak, sei fó informasaun ba funsionáriu hotu atu entende prosesu sira ne’e.

Envolve iha Enkontru Prezidente ho Komisáriu nain haat no ekipa husi INSS.