Comissão da Função Pública

26/01/2023/ – Prezidente Komisaun Funsaun Públika, Faustino Cardoso Gomes partisipa serimónia asinatura Memorandum de Entendimento entre Instituto Nacional de Desenvolvimento de Mão-de-Obra (INDMO) ho Ministériu Edukasaun Juventude no Desportu (MEJD) no entrega mós sertifikadu lisensiamentu operasional ba sentru formasaun professional hamutuk 36 iha kapital Díli no munisípiu sira ne’ebé akreditadu.

Memorandum de Entendimento asina husi Diretora INDMO, Isabel Fernandes de Lima no Raimundo José Neto, Diretor Jeral Polítika, Planu Inkluzaun Impresaun reprezenta Ministériu Edukasaun Juventude no Desportu.

Finalidade husi Memorandum de Entendimento atu oinsá kria kondisaun no fó apoiu ba sentru formasaun professional ne’ebé eziste iha kapitál Díli no munisípiu atu sai parseiru Governu hodi fó formasaun naun formal  área oi-oin ba Timor oan sira, liu-liu foinsa’e sira hodi hasa’e sira nia kapasidade atu kompete iha merkadu Traballu.

Sentru formasaun professional ne’ebé simu sertifikadu lisensiamentu operasionál hamutuk 36 ne’e rezultadu husi prosesu avaliasaun ne’ebé ekipa juri mai husi instituisaun Estadu no Institutu Públiku sira halo iha fulan Novembru to’o fulan Dezenbru tinan 2022. Exeptu sentru formasaun sia (9) mak la akreditadu tanba la priense kritériu mínimu no sei kontinua iha prosesu preparasaun. 

Serimónia asina akordu no entrega sertifikadu ba Sentru Formasaun Professional sira hala’o iha salaun formasaun Academia PNTL, Comoro Dili, konta ho partisipasaun Ministru Edukasaun Juvetude no Desportu, Armindo Maia, Ministru Koordeador Asuntus Ekonómikus, Joaquim Amaral, Sekretáriu Estadu Formasaun Professional no Empregu, Alarico do Rosario, Diretór INDIMO, Diretór Akademia Polísia  inklui Diretór husi sentru formasaun professional sira.