Comissão da Função Pública

Liu husi akordu entre Komisaun Funsaun Públika no International Labour Organization ba progama lae ba violénsia no asédiu iha Mundu Traballu no Funsaun Públika, liu husi Unidade Protokolu no Komunikasaun realiza programa semanál ho Rádiu METRO FM ba Progama Ita Nia Matadalan hodi ko’alia kona-ba Lae ba Violénsia no Asédiu iha Mundu Traballu no Funsaun Públika.

Violénsia no Asédiu Seksual katak, kualker konduta indezezada ho natureza seksual ne’ebé afeta dignidade feto ka mane tantu verbalmete ka lá verbalmente ka fízika ka ofensiva ou hatudu pornografia iha servisu fatin hanesan halo moe no halakon amizade entre funsionáriu sira iha mundu traballu, hateten Diretor Nasional Étika Disiplinar no Prosedimentu Administrativu, Lourenço Magno Barros durante debate iha Rádio METRO FM Kintal Boot iha Dili Kuarta-feira (20/07/2022).

Tuir Diretor Lourenço katak, prátika violênsia doméstika, asédiu seksual tantu prátika ne’e hanesan halo moe no halakon amizade tanba ne’e Komisaun Funsaun Públika oras ne’e dadaun servisu hamutuk ho Instituisaun interligadu halo diseminasaun informasaun ba komunidade ein jeral, liu-liu funsionáriu públiku no Ajente Administrasau Públika oinsá atu kombate no halo prevensaun ba aktus ne’e.

Relasiona ho asuntu ne’e iha 2017 Komisaun Funsaun Públika kria tiha ona orientasaun ida ho númeru 12/2017 ho objetivu atu kombate no prevene violênsia no Asédiu Seksual.

Iha parte seluk Organizasaun Naun Governamental ALFeLa, Marcia Siqueira reprezentante Diretora Ezekutiva, katak, ALFeLa ho nia papel importante ida atu fornese asistênsia legal ka edukasaun legal no advokasia no mós  halo akompañamentu ba aktus eh kazu sira ne’e.

Prátikamente ALFeLa simu keixa husi vítima sira ne’ebé konsidera grave, infelizmente vítima sira lakohi keixa, tanba sira hetan intimidasaun makas maibé, ALFeLa enkoraja vítima no kontinua ajuda too hetan desizaun. Wainhira vítima halo keixa, ALFeLa hatudu nia prontidaun hodi akompaña no tuir vítima sira nia hakarak durante prosesu keixa no julgamentu, esplika reprezentante ALFeLa iha rádiu METRO FM.