Comissão da Função Pública

Komisaun Funsaun Públika hamutuk ho ekipa integradu disemina regras, prosedimentu Funsaun Públika ba funsionáriu sira iha munisípiu Díli ho objetivu atu hasa’e koñesimentu funsionárius sira kona-ba kódigu étika maka dalan ba Governasaun Di’ak, hodi presta di’ak servisu ba públiku.

Iha abertura atividade ne’e komisáriu portfóliu Planeamentu Forsa Traballu, Avaliasaun Dezempeñu, Formasaun no Dezenvolvimentu, António Freitas hateten ba funsionáriu sira atu konsetra hodi rona no husu dúvida sira ne’ebé mak iha atu nune’e rezolve, liu-liu materia sira ne’ebé orador sira aprezenta, aproveita didiak hodi rona. Husu mós ba kazuais no ajente administrasaun públika ne’ebé mak mínimu liu iha kada departamentu, oinsá atu rezolve situasaun hirak ne’e. Alende ne’e komisáriu ko’alia ona ho Prezidente Autoridade munisípiu Díli hodi haree  atu diskute hamutuk oinsá buka atu  bele koloka mapa pessoal tuir nesesidade institusional sira.

Alende ne’e, komisáriu toka mós asuntu liga ho formasaun ninian ne’ebé fasilita husi INAP no FDCH agora foku no konsentra tomak ba formasaun munisipal sira, no bolsa estudu iha fatin-fatin dala ruma haree involvimentu munisípiu la iha, karik informasaun la iha.

Iha fatin hanesan Prezidente Autoridade Munisípiu Díli, Guilhermina Saldanha Ribeiro iha ninia abertura diseminasaun ne’e hateten, ho onra boot tebes agradese ba ekipa integradu husi KFP ne’ebé mak buka disemina materia sira liga ho regras no prosedimentu iha Funsaun Públika, no oportunidade di’ak hodi bele rona materia sira ne’ebé mai husi orador sira husi KFP, KAK, IGE, Patrimoniu Estadu, INSS no SEII no hanesan kapasitasaun ida durante loron rua no sai bukae ida ba imi iha futuru, atu nune’e bele hasa’e koñesimentu.

Atividade diseminasaun loron rua ne’e partisipa husi funsionáriu permanente, ajente administrasaun públika, kazuais husi munisípiu Díli entuziasmu tebes hodi tuir formasaun ho hakmatek no silensiu.

Iha enseramentu diseminasaun ne’e entrega mós sertifikadu ba partisipante sira ne’ebé tuir durante loron rua (24-25 Agostu 2022), iha administrasaun munisípiu Díli.