Comissão da Função Pública

Institutu Jestaun Ekipamentus (IJE I.P) no Ministériu Turizmu Komersiu no Industria realiza asinatura Memorandum of Understending (MoU) hodi loke dalan ba kompania ne’ebé kontrata husi Centro Nacional Chega (CNC) hodi halo konstrusaun monumentu Prezidensia Repúblika, mandatu saudozu Prezidente RDTL, Nicolao dos Reis Lobato iha Ermori.

Objetivu husi asinatura akordu ne’e, atu formaliza komprimisu servisu hamutuk entre Ministériu entre entidade sira ne’ebé maka ligasaun ho Turizmu Komunitáriu nia iha ligasaun asesu loke dalan, ligasaun ho planu konstrusaun monumentu em memória ba iha Saudozu Nicolao Lobato.

Antes de asina Mou Prezidente Komisaun Funsaun Públika hateten,  asina MoU ne’e oinsa atu asegura no oinsa atu alkansa objetivu prinsipal maka dalan ho distânsia kilómetru hat ho balun no populasaun iha área izoladu iha Ermori bele asesu ba estrada no seluk tan. Nune’e IGE atu fasilita loke dalan kilo haat ne’ebé ekipa avansada Komisaun Funsaun Públika identifika ona ba últimu jornada la’o tuir ain fatin ba saudozu Prezidente Nicolao dos Reis Lobato nian, relasiona ho atividade komemorasaun Loron Nasional Funsaun Públika ba dawalu nian ne’ebé mak realiza ona iha 15 jullu 2022.

“KFP fasilita eventu asinatura MoU entre IGE I.P ho MTKI tanba, atividade urjente atu hala’o kontrusaun monumentu ein omenajen ba saudozu Nicolao dos Reis Lobato iha área suku Manuterlau, baliza ho suku Liurai postu administrativu Remexio ninian. Fatin istóriku tanba, fatin ne’ebá mak uluk funsiona sai prezidensia repúblika iha tempu rezistensia durante tempu ukun Prezidente Nicolao Lobato, no iha ne’ebá funsiona ministériu no departamentu save sira hanesan Ministériu Justisa, kuartel jeral, Tribunal mós funsiona iha ne’ebá, ministériu informasaun no seguransa ne’ebé xefia husi ministru Alarico Fernandes iha tempu rezistensia funsiona mós iha ne’ebá no sira seluk tan. Ida ne’e KFP ninia atividade ida mak jornada la’o tuir ain fatin ba tinan ne’e planu jornada hahú husi suku Fatucalo, postu administrativu Turiscai, munisípiu Manufahi, hodi termina iha Ermori baliza entre suku Manuterlau, postu Metinaro no suku Liurai, postu administrativu Remexio,” esplika Prezidente KFP iha KFP Matadouro, Díli,

Haklean Prezidente KFP katak, KFP oinsá komunika, koordena atu oinsá bele hetan apoiu iha âmbitu konstrusaun monumentu, ne’ebé mak CNC prontu ona atu halo monumentu, tanba sira nia papel ida mak atu rejistu sítius istóriku sira, la’ós KFP. Nune’e Ermori sítiu istóriku ne’ebé importante tebes ne’ebé ezije hetan atensaun, tanba durante ne’e izoladu. Entaun KFP liu husi ekipa avansada tun ba terenu hodi indentifika no destaka sa’e hodi ikus mai kompromisu hamutuk husi ministériu sira (MOP, MTKI, MACLN, MAE, IGE I.P, CNC), entidade relevante, Prezidente Autoridade Munisípiu Díli, ne’ebé mak presiza harii monumentu ne’e. Tanba atu halo monumentu ne’e CNC kontrata ona kompania maibé dalan la iha entaun komunika ho IGE hodi loke dalan hodi realiza kontrusaun ba monumentu refere.

Relasiona ho asina MOU, Vise Ministra Turizmu Komunitaria, Inácia da Conceição Teixeira hateten, ho kooperasaun refere ida ne’e, loke dalan ba Ministériu Turísmu katak, fatin sira ne’ebé maka aban bainrua estrada difísil atu asesu, IJE iha ne’e prontu para apoia no konsidera serimónia ne’e reinforsa fila fali kooperasaun servisu.

Enkuantu Ministru Obras Públika, Abel Pires konsidera pertinente teb-tebes no liafuan sira ne’ebé Prezidente Komisaun Funsaun Públika hato’o klaru tebes relasiona ho fatin ne’e istóriku tanba, ne’e presiza promove no fahe nafatin istória ba ita nia oan sira.

 “MoU ne’e hodi garante implementasaun iha tempu badak, tanba fatin ne’ebé atu kontrui monumentu importante iha tempu istóriku tempu Prezidente Nicolao Lobato nia mandatu iha ba sai hanesan sentru Repúblika demokrátika hala’o iha ne’ebá.  Nune’e MOP kompromete apoia hodi fasilita kontrusaun monumentu hodi kontinua fahe ita nia istória funu nian ba jerasaun foun sira, no momentu ne’ebá sai hanesan sentru atividade ekonómiku ba ita nia povu sira no garante katak, sei konklui lais antes tempu udan.” hateten Abel Pires iha kuarta feira, (24/08) iha KFP.

Asina MoU ne’e feitu husi Prezidente IJE I.P, Ermenegilda da Costa Laurentina ho Diretor Jeral MTKI, Jelino Soares testemuña diretu husi Ministru Obras Públikas, Abel Pires ho Vice Ministra Turízmu, Inácia da Conceição Teixeira Prezidente Autoridade Munisípiu Díli, Centro Nacional Chega (CNC), MAE, Prezidente no Komisárius KFP, Sekretária Ezekutiva SKFP no MAE ne’ebé koordena husi KFP.

Hafoin Asina tiha MOU Prezidente IJE-IP Ermenegilda da Costa Laurentina, rekoñese servisu refere la tama ba planu IJE-IP  maibé, ho esforsu Prezidente Komisaun Funsaun Públika hanesan kooperasaun di’ak no konsege realiza serimónia ne’e no iha tempu badak IJE sei prepara ekipamentus, Rekursu, Operadores sira motoristas no enjeñeiru sira atu destaka ba iha fatin ne’ebá.