Comissão da Função Pública

Ataúro, Ekipa kuadrilateral kompostu husi Provedoria Direitus Umanus no Justisa (PDHJ), Komisaun Funsaun Públika (KFP), Komisaun Anti Korrupsaun (KAK) no Inspesaun Jerál Estadu (IGE) kontinua disemina informasaun kuadru legais sira ba autoridade Ataúro durante loron tolu.

Komisáriu Portfólio ba Asuntu Disiplinár, Agapito da Conceição, no Diretór Nasionál Planeamentu Kuadru Pesoál Funsaun Públika (DNPQPFP), Fransisco da Costa Pereira, sai oradór hodi ko’alia kona-ba “Promove Integridade Funsionáriu Públiku ba Jestaun Efisiénsia no Efikasia Rekursu Estadu no Direitu no Devér Funsionáriu Públiku (Estatutu Funsaun Públika Lei númeru 8/2004 altera ba Lei númeru 5/2009)”. Formasaun ba Funsionáriu kargu diresaun no xefia sira iha Autoridade Administrativa Ataúro ho tema “Prevene no Kombate Korupsaun hodi Promove Governasaun Di’ak no Proteje Direitus Umanu iha Administrasaun Públika iha Timor – Leste”, ne’ebé hala’o iha salaun enkontru Autoridade Administrativu Ataúro, Beloi – Ataúro.

Formasaun ne’e ofisialmente lansa abertura husi Provedór PDHJ, no Komisáriu KFP no matéria Diretor DNPQPFP, Fransisco da Costa Pereira aprezenta matéria kona-ba integridade, rekursu estadu, devér jerál no espesiál sira, responsabilidade no proibisaun sira, kódigu étika funsaun públika, meius atu garante disiplina funsionáriu nian, prosedimentu no abertura prosesu disiplinár, investigasaun prelimináriu, no eskala pena disiplinár sira no hafoin aprezentasaun kontinua ho diskusaun.

Formasaun ne’e hala’o bazeia ba serbisu hamutuk entre ekipa kuadrilaterál Provedoria Direitus Umanus no Justisa (PDHJ), Komisaun Funsaun Públika (KFP), Komisaun Anti Korrupsaun (KAK/CAC) no Inspesaun Jerál Estadu (IGE), nu’udar polítika prevene no kombate korrupsaun hodi promove governasaun di’ak no proteje direitus umanus iha Timor-Leste, presiza hakbiit vontade boot husi instituisaun relevante sira hodi serbisu hamutuk atu bele minimiza no hadook an husi hahalok korrupsaun no administrasaun la di’ak ba iha funsionamentu nu’udar mákina estadu iha Timor-Leste, espesiál iha Autoridade Administrativu Ataúro.

Objetivu husi formasaun maka atu hasa’e koñesimentu, titulár kargu diresaun no xefia sira iha Autoridade Administrativa Ataúro, hasa’e prestasaun serbisu, responsabilidade, disiplina, integridade no dezempeña sira nia funsaun ho maneira loos, no mós kontrolu ho efikás no efisiente ba funsionáriu iha Autoridade Administrativa Ataúro, hasa’e koñesimentu no informasaun kona-ba papél KFP, PDHJ no IGE kona-ba promove integridade funsionáriu Públiku ba jestaun efisiénsia no efikásia rekursu estadu nian, atu bele sente responsabilizadu hodi hala’o serbisu bazeia ba norma ne’ebé iha no prinsípiu, no violasaun Governasaun Di’ak, tipu no forma korrupsaun iha setór públiku inklui kontrolu utilizasaun rekursu estadu nian.

Partisipa iha formasaun ne’e titulár kargu Sekretáriu Administrativu, Diretór Rejionál sira, Xefe Departamentu, Xefe Seksaun sira, Administradór Postu no funsionáriu Públiku sira ho totál hamutuk ema na’in 33, kompostu feto na’in 4 no mane na’in 27. Formasaun ne’e hala’o durante loron 3, hahú (20-22 Outubru 2025).