Comissão da Função Pública

Ataúro – Provedor Provedoria Direitus Umanus no Justisa (PDHJ), Komisáriu KFP ba portfóliu Disiplinár, Adjuntu CAC, no IGE no ekipa téknika halo vizita surpreza ba iha sentru eletrisidade Autoridade Administrativa Ataúro, no estasaun Polísia Ataúro, iha tersa-feira 21/10/2025.

Provedor PDHJ, Virgilio da Silva Guterres “Lamukan”, esplika, vizita surpreza ba iha sentru eletrisidade Ataúro, hasoru malu ho koordenadór EDTL Ernesto Guimarães, hakarak atu hatene kona-ba mekanizmu servisu, inklui jestaun iha sentrál EDTL, tanba tuir informasaun ne’ebé simu katak, eletrisidade iha Ataúro lakan de’it oras 18, hahú husi tuku 6.00 dader to’o 12.00 kalan, maibé kuandu alta entidade ka membru Governu ruma mai vizita mai Ataúro, eletrisidade lakan to’o oras 24, nune’e ekipa ninia vizita hakarak atu hatene mekanizmu no funsionamentu EDTL Ataúro nian.

Tuir esplikasaun koordenadór EDTL Ataúro Ernesto Guimarães, katak seidauk fornese enerjia ba oras 24 ho razaun ekonómika, maibé bele sai baze rekomendasaun ba EDTL Ataúro atu eletrisidade bele lakan oras 24 hanesan mós iha Dili, atu nune’e labele iha diskriminasaun. Ba kestaun ne’e, agora iha jeradór tolu, ida-idak ho kapasidade 1000 KW, kondisaun di’ak hotu, pois abastesimentu ba kombustível mai dala ida aguenta ba fulan ida nian, ne’ebé sei bele garante eletrisidade lakan to’o oras 24.

“Kompriende katak eletrisidade estadu seidauk bele goza retornu ida di’ak tanba lakon mak barak. Maibé risku ne’ebé estadu foti maka oinsá garante uluk ba populasaun asesu eletrisidade, depois mak haree ba parte ekonomia nian. Informasaun ne’ebé ami (ekipa) sente kontente tanba husi aldeia 19 iha suku 5 iha Atauro, maioria asesu ona enerjia eletrisidade, enkuantu hela de’it ona aldeia tolu mak seidauk asesu eletrisidade tanba seidauk asesu ba estrada. Espera, liu husi planu programa ‘Timor ba Naroman’ ne’ebé sei implementa iha tinan 2026, populasaun Atauro sei asesu hotu ona eletrisidade.” Esplika Koordenador EDTL Ataúro Ernesto Guimarães.

Hafoin vizita sentru EDTL, ekipa halo mós vizita ba estasaun Polísia hodi hasoru malu ho Komandante PNTL Interinu Inspetór Xefe Miguel Bere Soares, hodi rona servisu no jestaun servisu loro-loron hodi asegura seguransa interna ba atendimentu no kaer metin prinsípiu profesionalizmu no integridade, rekursu umanus, fasilidade komunikasaun no transporte, kondisaun fatin servisu ne’ebé difikulta ba servisu operasionál.

Enkuantu iha loron segunda-feira, 20/10/2025, Provedor, Komisáriu portfóliu disiplinár no reprezentante IGE hala’o uluk vizita surpreza ba Sentru Saúde Atauro hodi hasoru malu ho Diretór Saúde Dano Pires Sosuza, hodi rona kona-ba jestaun ba atendimentu Saúde komunidade ne’ebé haree ba jeográfika Ataúro nian ne’ebé komunidade hela dook malu, fasilidade Saúde. Ekipa mós halo observasaun ba fatin parteira fó partu ba inan isin-rua, fatin baixa ne’ebé halo hela reabilitasaun, mákina ba teste raan iha laboratóriu, ne’ebé nota mós katak, menus espesialista ba moras Tuberkuloze, ambulánsia ida de’it difikulta atendimentu ba pasiente emerjénsia iha fatin diferente iha oras ne’ebé hanesan.

Vizita surpreza ikus, ekipa kuadrilateral hala’o vizita ba iha Fundu Espesiál Dezenvolvimentu Ataúro (FEDA), hasoru malu ho Adjuntu Diretór Adão Soares hamutuk ho ekipa injeñeiru, hodi atu buka hatene jestaun koordenasaun servisu FEDA ho autoridade Ataúro ba implementasaun projetu dezenvolvimentu, inklui fasilidade no forsa traballu iha FEDA ne’e rasik.

Nune’e, Provedor, Komisáriu Asuntu Disiplinár hamutuk ho ekipa FEDA bá halo mós observasaun direta ba projetu loke estrada foun hahú husi aldeia Arlo ne’ebé to’o ona iha aldeia Adara, Suku Beloi-Ataúro, ho distánsia kilométru 4 resin, ne’ebé obra refere implementa husi kompañia Bandidu Kualidade.

Provedor hamutuk ho ekipa kuadrilateral sei halo komunikasaun rutina ho Ministériu relevantes hodi buka solusaun ba difikuldade no problema ne’ebé kada instituisaun sira ne’ebé kontinua enfrenta, buka hodi mellora liután ba iha atendimentu públiku. No ekipa kuadrilateral halo mós observasaun ba atividade diseminasaun kona-ba knaar/papél PDHJ, Direitus Umanus, Igualdade Jéneru no Tráfiku Umanu ba estrutura no komunidade hamutuk 60 iha Suku Vila Maumeta, iha Autoridade Administrativa Atauro.