Comissão da Função Pública

Funsionáriu Rekrutadu Foun Iha Obrigasaun Tuir Kursu Indusaun Jeral

kursu indusaun

Díli, 25/04/2022, Prezidente Komisaun Funsaun Públika, Faustino Cardoso Gomes hamutuk ho Diretor Jeral Institutu Nasional Administrasaun Públika (INAP), Agostinho Letêncio halo abertura ba programa kursu Indusaun Jeral ba Funsionáriu rekrutadu 2021 husi Ministériu Saúde, Ministériu Interior no Ministériu Defeza.

Formadus hamutuk nain 265 kompostu husi nasional ema nain 118 no Munisípiu nain 147. Programa kursu Indusaun Jeral ba formadus nain 265 sei hala’o fazeadamente, kursu ba faze dahuluk nian partisipantes hamutuk nain 132 kompostu feto nain 49 no mane nain 83 ho durasaun formasaun loron 15, hahú (25 Abril to’o loron 13 Maiu 2022). Hafoin ne’e kontinua ba iha kursu ba faze daruak sei hala’o iha (6-24 juñu 2022).

Prezidente KFP Faustino Cardoso Gomes hateten, formasaun Indusan Jeral ne’e hala’o liu husi servisu hamutuk ho INAP, Komisaun Funsaun PúblikA, Ministériu Saúde, Ministériu Interior no Ministériu Defeza ne’ebé implementa husi INAP ho tipu obrigatória ba funsionariu ne’ebé liu ona teste rekrutamentu hodi ingresa tama iha Funsaun públika, bazeia ba lei estatutu Funsaun Públika. Ba sidadaun ne’ebé admitidu tama iha Funsaun Públika tenki liu husi formasaun indusaun obrigatória atu hatene nia direitu no dever sira ne’ebé tenki halo tuir hodi hatudu atitude, komportamentu hodi koresponde ba natureza servisu nu’udar funsionáriu públiku.

Entretantu Diretor Geral INAP, Agostinho Leténcio esplika, formasaun ne’e hala’o bazeia ba dekretu lei nú. 38/2012, ho karakter obrigatóriu ba funsionáriu foun sira ne’ebé foin rekruta no tama iha Funsaun Públika.

Objetivu husi formasaun indusaun jeral hanesan, sesaun instrusaun ba funsionáriu públiku sira ne’ebé foin hola parte iha Funsaun Públika atu hatene sira nia direitu no dever sira atu evita monu iha aktus mal administrasaun hodi asegura governasaun ne’ebé di’ak.

Materia ba formasaun sei foka liu ba tipu tolu hanesan, Nasionalizmu no Patriotizmu, dedikasaun ba Funsaun Públika, Lei no prosesu legal sira, inklui material bazáku kona-ba atendimentu nu’udar servidor Estadu ba atendimentu ba públiku ne’ebé di’ak hodi asegura governasaun di’ak.