Comissão da Função Pública

Promosaun por antiguidade ba tinan ne’e funsionárius nain rihun tolu resin mak sei promovidu no tinan 2026 mak foin hetan efeitu salarial.

Prezidente Komisaun Funsaun Públika, Agostinho Letêncio de Deus esplika, KFP hahú propoin ba Konsellu Miinistrus ho promosaun tuir antiguidade hodi fó oportunidade ba funsioárius públikus ne’ebé liu tinan walu (8) ba leten nunka promovidu. Ba tinan ne’e KFP rejista funsionárius públikus antiguidade, prosesu ona no kuaze finaliza ona. Maibé iha rekursu lubun ida mak funsionárius hato’o mai KFP liu husi ekipa juri sei haree, no konklui ninia prosesu sira mak foin bele fó sai lista final hodi omologa husi Komisaun.

Promosaun tuir antiguidade ne’e mós iha kritérius lubun ida, kritériu ida mak  hanesan sertifikadu formasaun mínimu formasaun 40 oras, kada sertifikadu iha valór 75 no sei konsidera sertifikadu rua ba somasaun valor 150, ficha avaliasaun dezempeñu mínimu BOM no MUITO BOM, wainhira hetan sufisiente entaun valór sei tun. Kritérius seluk funsionáriu servisu kleur eh tempu barak nunka hetan promosaun ruma, no seluk tan, dehan Prezidente KFP ba jornalista GMN TV, iha knár fatin KFP, iha (20/10/2025).

Servisu sira ba avaliasaun ne’e juri la’ós husi KFP de’it maibé mai mós husi liñas ministeriais sira hodi verifika dokumentu sira tuir grau ida-idak nian. Tanba ida ne’e importante tebes atu garante transparente no la iha interese privadus ruma liga ho funsionariu ida-idak nian. Tamba ne’e ekipa juri ne’ebé mak independente no saida mak ekipa juri sira deside ne’e mak KFP foin foti hanesan desizaun. Ba kualker dokumentu verifika no análize, wainhira iha rekursu ruma juri kontinua haree hodi deside, no semana oin KFP omologa de’it lista final, esplika nia.

Nia hatutan, ba tinan ida ne’e promosaun ordinariu seidauk iha, hanesan tinan-tinan funsionárius sira mai teste ne’e, no agora ita sei haree ba funsionáriu hamutuk 3.500 resin mak hetan promosaun tuir antiguidade. KFP sei deskuti atu haree fali iha ga lae? tamba agora iha hela prosesu reforma obrigatória ho idade 65 anos sei reforma iha tinan 2026.