Comissão da Função Pública

Prezidente Komisaun Funsaun Públika (KFP), Faustino Cardoso Gomes no Komisariu Komisaun Anti Korupsaun (KAK), Sergio de Jesus Fernades da Costa Hornai  iha segunda feira,  (28/03) halo abertura  ba konkursu  elektrónika ba kandidatu nain 654, kompostu husi feto 227 no mane 427  hodi  kompete ba vaga 27 iha KAK.

Prezidente KFP, Faustino Cardoso Gomes iha diskursu abertura konkursu hateten, lori KFP nia naran hato’o kongratulasaun ba konfiansa husi Komisaun Anti Korupsaun hodi uza sistema teste elektrónika liu husi sistema TCExam iha âmbitu atu tais kandidatu sira hodi priense vaga 27, ba área 10 ne’ebé define iha polítika KAK nian.

Tuir Prezidente KFP, espíritu esforsu servisu hamutuk orgaun Estadu entre  KFP no KAK atu asegura prosesu konkursu ne’e bele la’o ho kredibilidade, transparansia, tane ás responsabilizasaun hodi hametin no asegura liu tan natureza servisu KAK nian, ne’ebé tenke hetan ema ho kualifikadu la’os de’it kestaun kompeténsia téknika profisional, maibé tenke iha espíritu vontade ne’ebé adekuadu tuir situasaun no karakteristíka ba vaga ida-idak nian.  

Kongratulasaun mós ba kandidatu sira tanba, konsege konkista etapa selesaun dokumentus  ne’ebé kompetitivu tebes, tanba ne’e husu nafatin ba kandidatu sira atu kontinua hatudu vontade esforsu espíritu matenek profisional atu bele konkista liu tan iha prosesu etapa teste, hodi ikus mai tama kategoria klasifikadu no admitidu bele priense ba vaga 27 tuir polítika KAK nian. 

Sorin seluk Komisáriu Komisaun Anti Korupsaun, Sergio de Jesus Fernades da Costa Hornai hateten, prosesu rekrutamentu ba espesialista KAK nian ne’e servisu ida ne’ebé ho responsabilidade, transparansia, akontabilidade responsabilizasaun ba aktus ne’ebé halo atu kandidatu sira senti konfortavél hodi partisipa iha teste ho di’ak. Haktuir nia ba kandidatu ne’ebé hetan valor di’ak no liu iha teste iha futuru sei sai espesialista anti korupsaun ho kualifikasaun ás iha área oi-oin atu bele tulun setór justisa iha Timor-Leste liliu iha material investigasaun kriminal ba iha kombate kriminalidade korupsaun ne’ebé iha relasionamentu ba iha polítika públika Estadu nian utilizasaun orsamentu no dezisaun estratéjiku ne’ebé halo ba nasaun Timor-Leste.

Entretantu tuir relatóriu husi Diretor Jeral KAK, Luis Ercio hanesan prezidente Juri Luis de Jesus X. Guterres katak aplikantes hamutuk 2.424 maka hatama dokumentus no liu husi prosesu selesaun dokumentus husi ekipa juri iha ema nain 654 maka klasifikadu kontinua hakat ba teste eskrita ho sistema elektrónika.

Teste eletrónika ba kandidatu nain 654, teste sei la’o durante loron rua hah’u segunda feira (28/03) no remata iha tersa feira, (29/03) hala’o iha salaun Aikurus Binani Komisaun Funsaun Públika, Matadouro, no hetan observasaun direita husi Prezidente KFP, Faustino Cardoso Gomes, Komisáriu KAK, Sergio de Jesus Fernades da Costa Hornai hamutuk ekipa painel juri no ekipa tékniku husi KFP no KAK.