Comissão da Função Pública

Díli, 28 Marsu 2022, Komisaun Funsaun Públika (KFP) fó pose ba kargu diresaun 4 kompostu husi emposadu sira hanesan, Sonia da Silva Soares, nu’udar Inspetora iha Gabinete Inspesaun no Auditoria, Élio Pereira Guimarães, nu’udar Xefe Unidade ba Peskiza, Polítika no Observasaun iha Funsaun Públika, Lidónia Manuel nu’udar xefe Unidade ba Dezenvolvimentu Sistema ba Informasaun iha Funsaun Públika no Lídia Aquelina Imaculada Conceição nu’udar xefe Unidade Protokolu no Komunikasaun Sosial hodi kompleta ba kargu diresaun ba estutura Sekretariadu KFP ba alterasaun estatutu KFP.

Prezidente KFP fó parabéns no kongratula no enkoraja konkistadores emposadus sira hodi serbí ho responsabilidade hodi asegura kontinunidade prestasaun servisu tuir área kompetensia ida-idak ninian.

“Oinsá makasegura responsabilidade no responsabilizasaun, sistema kontrolu internu Funsaun Públika ninian atu oinsá mak asegura boa governasaun, transparansia, prestasaun servisu ho kualidade, profisional, la iha partidarizasaun. Hanesan mós ho Komisáriu sira ne’ebé mak iha KFP ami komunga kompromisiu hanesan, la iha partidarizasaun, iha ne’e imi tenke aposta ho kualidade, prestasaun servisu, responsabilidade, atu oinsá servisu ho di’ak.” hateten Faustino Cardoso Gomes iha serimonia pose SKFP nian.

Hanesan knár foun Dezenvolvimentu Sistema Informasaun iha Funsaun Públika ne’e oinsá bele dezenvolve sistema ida lalais, efikaz, asesivél, transparante iha âmbitu  ne’ebé mak lori ita oinsá atualizadu ho evolusaun teknolojia informátika, mehi boot ne’ebé mak III mandatu KFP aposta hela atu realiza.

“Uluk ita hamutuk ho QUIDGEST dezenvolve desde 2005, maibé ita la iha plena direitu pertense, agora SIGAP foun ita iha direitu pertense, plenamente. Ita sei oinsá uza kreatividade, inovasaun tomak atu hodi halo sistema ida ne’e sai modernu liu tan, serbisu lais liu tan, atu la lakon ho evolusaun teknolojia informátika ne’ebé oras ne’e mundu tomak hasoru no sai parseiru diak. No oinsá mak baze dadus sira sempre atualizadu, informadu ba funsionárius públikus sira husi nasional to’o suku sira. Tanba oras ne’e la iha baliza ba mota koak no fahi luhan sira ne’e, HP alkatel ka Android halakon hotu bareira geográfika sira ne’e, tanba dezenvolvimentu infraestrutura telekomunikasaun ne’ebé kompetitivu mak oras ne’e TL iha.

Iha intervensaun Prezidente Komisaun Funsaun Públika husu ba emposadus sira atu oinsá la’o tuir regras hodi asegura integridade Funsaun Públika, hodi hatudu imparsiliadade, hatudu responsabilidade no ami hein katak, iha estrutura foun ne’e bele ajuda, bele apoia implementasaun ba perioridade KFP nian no atu oinsá mak lori ita nia susesu ba ita nia mehi instituisaun ida ne’e.

 No salienta liu tan katak, pose ne’e inspirativa, motivadora ba ita sira seluk, iha mundu ne’e kargu laos milik privadi maibé hak pake de’it, maibé pake ho responsabilidade. Se la uza ho responsabilidade sei hasoru reponsabilizasaun.

Ba ida ne’e nu’udar knár prinsipal GIA nian oinsá hare ba boa governasaun hare ba responsabilidade no responsabilizasaun. Ho esperansa husi inspetora foun nia oinsá kontinuidade servisu no hadiak liu tan ba futuru.

“Knár foun ne’ebé ha’u simu nu’udar inspetora ba KFP liga ho kontrolu internu, tanba durante ne’e servisu la’o hela, ha’u mai atu apoiu, kompleta saida mak seidauk halo ita sei hare ba futuru mai oinsá atu hadia liu tan kontrolu internu iha Funsaun Públika,” hateten Inspetora foun Gabinete Inspesaun no Auditoria, Sonia da Silva Soares.

Serimonia pose no asinatura termu aseitasaun hala’o iha KFP, Matadouro, Díli.