Comissão da Função Pública

Kandidatus nain 38  kompostu konkore ba vaga kargu diresaun munisipál Covalima ne’ebé liu husi ein koordenasaun entre Ministériu Administrasaun Estatal (MAE) no Komisaun Funsaun Públika liu husi diresaun nasional rekrutamentu no dezenvolvimentu iha Funsaun Públika ne’ebé iha tersa feira, (07-02-2023) hetan loke ofisialmente husi Prezidente Komisaun Funsaun Públika, Faustino Cardoso Gomes liu husi teste sistema eletróniku TCEXAM, iha salaun Aikurus Binani, KFP, Matadouro, Díli.

Iha abertura teste ne’e Prezidente Komisaun Funsaun Públika, Faustino Cardoso Gomes husu ba kandidatu sira hafoin liu tiha prosesu selesaun ba  avaliasaun dokumentu, ho kandidatus nia vontade no kapasidade destaka wainhira manan iha fatin refer,  nafatin mantein profisional durante servisu.

“Fatin ne’ebé manan ba la’ós permanente, halakon tiha hanoin dehan katak, maka ne’e ona, ne’e ha’u nian ona, ema ida la bo’ok tan ona, labele monu iha tentasaun pensamentu ida hanesan ne’e, tanba prosesu destacar, profesionalíssmo, na verdade, ne’e sei sukat liu husi prátika servisu, dezempeñu iha terenu. ‘’A Prática é o criterio da verdade’’. Komisaun Funsaun Públika servisu hamutuk ho Ministériu Administrasaun Estatal atu oinsá maka viabiliza prosesu ida ne’e, fó biban ba imi atu imi ida-idak tenta hatudu imi nia kapasidade, imi nia kompetênsia tuir vaga ne’ebé maka imi ida-idak konkore ba hodi nune’e bele sai responsável ba kargu ne’ebé maka iha hodi presta servisu ida que di’ak, ho efisénsia, ho efikás, hatan duni ba espetativa Povu ninian hodi buka ajuda, liberta sira sai husi moras, sai husi ki’ak tuir mehi lulik luta rezistênsia nian ne’ebé la’ós de’it liberta pátria, mais como libertár o povo”, hateten Prezidente KFP iha abertura teste.

Prezidente KFP husu ba painél juri sira akompaña didiak ba prosesu ne’e, no fó parabéns ba kandidatus tomak, hare’e didiak ba, uza didiak oportunidade ne’ebé maka iha hodi buka konkista vagas tuir preferénsia ne’ebé maka kandidatu ida-idak destaka tiha ona.

Total kandidatu ba teste eskrita ba vagas hamutuk 18, total kandidaturas hamutuk 48 kompostu husi feto na’in 5 no mane na’in 43, ne’ebé admitidu ba prova eskrita hamutuk 38, kompostu husi feto na’n  4 no mane na’in 34.