Comissão da Função Pública

Tomada pose ba kargu xefe departamentu nain 15 importante no marka istória iha kontestu Administrasaun iha âmbitu oinsá haforsa estrutura administrasaun nian iha Munisípiu Covalima enkuantu vaga tolu sei kontinua re-anunsiu.

Prezidente Komisaun Funsaun Públika, Faustino Cardoso Gomes hato’o lia hirak ne’e iha  diskursu serimónia tomada pose ba Xefe departamentu munisipal Administrasaun iha tersa feira, (11/11/2022)  iha salaun enkontru Administrasaun munisípiu Covalima.

Prezidente KFP, Faustino Cardoso Gomes esplika, emposadu nain 15 ne’ebé admitidus liu husi prosesu ida naruk, kompetitivu husi kandidatu nain 62 hodi hadau lisuk vaga 18 ikus mai ema nain 15 maka konsege konkista, rezultadu husi servisu hamutuk entre KFP servisu rekursu umanus Ministériu Administrasaun Estatal no Munisípiu Covalima rasik liu husi kompozisaun painel juri, hodi  asegura boa jestaun komprimentus ba regras legais.

Tuir Faustino Cardoso Gomes katak, prosesu rekrutamentu la’o kompetitividade, transparansia la iha fatór subjetivu maka sikat leet maibé, senti preokupa tanba, husi emposadu nain 15 iha feto nain 3 de’it. Ida ne’e hatudu feto nia hakarak kompete iha prosesu kompetitivu sei fraku, tanba ne’e pontu fokal Sekretáriu Estadu Igualidade no Inkluzaun Munisípiu Covalima tenki servisu maka’as hodi enkoraza liu tan partisipasaun feto iha estrutura administrasaun bazeia ba dekretu no. 3/2016 ho nia alterasaun  dekretu lei no. 54/2022 kona-ba kuota hodi forma méritu avansa ho selesaun pur meritu. Husu mós  ba emposadu sira halo komunikasaun, koordenasaun ne’ebé di’ak tanba servisu ne’ebé foun sempre ezije kreatividade servisu inovasaun atu oinsá maka área kompeténsia ida-idak tenki sai realidade iha jornada kareira atu konkista ba bei-beik. Servisu labele haree de’it ba interese pessoál, individu grupu no koor maibé, tenki servisu ho fuan no laran hodi halo tratametu hanesan ba ema hotu.

Prezidente KFP, husu mós ba família no ba parte hotu ne’ebé marka prezensa iha serimónia tomada pose fó apoiu moral atu labele monu iha pekadu ruma ne’ebé bele prejudika kareira tanba bainhira implikadu ho prosesu disiplinar sei la hetan direitu tinan 3 hodi assume kargu. Prezidente Faustino Cardoso Gomes lori KFP nia naran agradese ba administrador munisípiu Covalima, painel juri no ekipa téknika sira nasionál no munisípiu ne’ebé servisu ho profesionál husu atu kontinua manten servisu hamutuk iha futuru.

 Entretantu, administrador munisípiu Covalima, Fransisco de Andrade hateten, knaar nu’udar xefe departamentu presiza iha planu servisu no sai ezemplu ba funsionáriu iha ida-idak nia diresaun no kada enkontru koordenasaun munisípal kada diretor sei aprezenta nia planu orsamentu  no sei to’o ba nivel xefe departamentu hodi halo aprezentasaun planu orsamentu  atu labele dependensia de’it ba diretor sira  tanba, nu’udar servidor tenki konsiente katak, tenki kontribui ba prosesu dezenvolvimentu nasionál.

Partisipa iha serimónia tomada pose Diretor Jeral Desentralizasaun husi Ministériu Estatal, reprezentante komando PNTL Covalima no família esposadu no emposada.