Comissão da Função Pública

DILI – Komisaun Funsaun Públika (KFP) foti ona desizaun ba kazu alegasaun asédiu seksual ne’ebé envolve eis-Diretór husi Eskola Ensinu Sekundáriu Nicolao Lobato, Comoro, no kazu ida seluk iha Eskola 5 de Maio. Rezultadu investigasaun hatudu katak arguidu sira simu de’it pena repreensaun eskrita, tanba laiha evidénsia ne’ebé forte, esklarese Komisáriu ba Asuntu Disiplinár KFP, Agapito da Conceição, ba jornalista sira iha ninia knuar fatin, Matadouro, Dili, iha Tersa-feira (10/03/2026).

Tuir Komisáriu Agapito, desizaun ne’e bazeia ba prosesu investigasaun ne’ebé kle’an, hodi rona deklarasaun husi vítima, suspeitu, no sasin sira. Maske iha akuzasaun, ekipa investigador konklui katak la konsege rekolla prova ne’ebé iha hodi konsidera kazu ne’e nu’udar kriminál.

“Kazu ne’e la’ós prosesu kriminál kuandu bazeia ba investigasaun ne’ebé halo. Se karik kriminál, ami bele fó suspensaun ka demisaun. Maibé, tanba laiha evidénsia forte iha terenu, ami fó de’it repreensaun eskrita. Tanba la konsidera nu’udar krime, KFP mós la hakat hodi haruka kazu ne’e ba Ministériu Públiku ka Tribunál, maibé desizaun ne’e foti de’it iha ámbitu administrativu Funsaun Públika nian,” dehan Agapito da Conceição.

Maske pena ne’e konsidera kmaan, Komisáriu ne’e esplika katak ida-ne’e sei iha konsekuénsia ba karreria funsionáriu nian ne’ebé afera ba nomeasaun ba kargu xefia ruma ou kargu xefia ne’ebé sira kaer agora no funsionáriu afetadu ne’ebé simu pena ne’e labele tuir promosaun ba grau (eskalaun) durante tinan tolu (3) nia laran. Sira foin bele kontinua fali sira-nia promosaun hafoin períodu ne’e remata.

Nia hatutan katak, pena ne’ebé bele fó impaktu direta ba kargu xefia mak “pena suspensaun” (fulan ida ba leten) ka “demisaun” (hasai husi servisu).

KFP mós fó fatin ba parte sira ne’ebé la satisfás ho desizaun ne’e, liuliu vítima sira, hodi hato’o sira-nia insatisfasun liuhusi dalan legál. Bele aprezenta rekursu fali ba Komisaun Funsaun Públika, liuliu ba Komisáriu Asuntu Disiplinár no bele lori kazu ne’e ba Tribunál se sira sente katak desizaun ne’e la justu.

Komisáriu Agapito afirma katak KFP prontu atu fó resposta no defende sira-nia desizaun administrativu iha kualkér instánsia judisiál.