Comissão da Função Pública

Komisaun Funsaun Públika asina memorandum entendimentu ho Institutu Nasional Administrasaun Públika (INAP) no Fundu Dezenvolvimentu Kapital Umanu (FDCH) atu reforsa servisu hamutuk entre instituisaun tolu ba iha ambitu formasaun no bolsa estudu ba funsionáriu públiku sira.

Komisariu portefóliu Planeamentu Forsa Traballu, Avaliasaun Dezempeñu, Formasaun no Dezenvolvimentu, António Freitas hateten, asinatura memorandum entendimentu entre instituisaun tolu hodi kompleta ba dekretu lei numeru 13/2020 hodi bele operasionaliza servisu hamutuk kona-ba formasaun no bolsa estudu ninian, liu-liu ba funsionárius públikus sira hodi bele rezolve problema sira passadu nian ne’ebé instituisaun ida-idak submete direta ba FDCH, no fim instituisaun sira balun lahatene, haruka ba ne’ebé ita lahatene entaun problema hirak ne’e INAP, KFP no FDCH foti inisiativa asina MoU ida ne’e hodi kesi  prosesu operasionalizasaun no implementasaun la’o diak. Ho nune’e instituisaun sira iha sira nia planu enkamiña mai KFP no INAP mak implementa iha terenu no finansia husi FDCH, hodi hare ba kapasitasaun ba funsionariu públiku sira.

Iha tempu hanesan Diretor Jeral husi INAP, Agostinho Letencio agradese ba KFP no FDCH  hodi hamutuk ho INAP bele realiza asina memorandum entendimentu ida ne’e hodi asegura diak liu tan ba kapasitasaun rekursu umanus iha administrasaun públika Timor-Leste. Ita hein katak ida ne’e sai hanesan baze ida ba entidades tolu ne’e atu asegura kapasitasaun ne’ebé kualidade ba ministeriu no instituisaun sira hotu, ne’ebé ba oin ita realiza programa siran ne’e liu husi odamatan ida deit mak instituisaun tolu ne’e mak deside no kordena hamutuk ba realizasaun programa formasaun no bolsa estudu sira hodi asegura ho efikasia, ho atendimentu ne’ebé lalais ba liñas ministeriais sira.

Alende ne’e husi diretora ezekutiva FDCH, Leila Carceres mos haklean liu tan katak, dekretu lei numeru 13/2020, 15abril ne’e ajuda tebes implementasaun kapasitasaun ba iha funsionariu publiku sira, bazeia ba passadu liñas ministeriais sira ida-idak organiza an, la iha kontrolu ne’ebé mak diak tantu iha monitorizasaun no fiskalizasaun ladun lao diak ba funsionariu sira ne’ebé mak simu formasaun no estudu. Liu husi akordu ida ne’e FDCH nia parte asegura orsamentu atu bele apoiu ba iha implementasaun programa ne’ebé mak hatur liu husi INAP ba formasaun área jenériku no área espesializada no mos ba apoia estudu ba funsionariu sira.

Entretantu formasaun hirak ne’e seidauk implementa, tanba ita iha hela aktual pandemia ne’ebé mak labele implementa. Maibé oras ne’e iha instituisaun AIFAESA.Ip mak implementa uluk ona formasaun iha área espesializada ba iha kualidade supervizaun no kontrola sasan iha merkadu Timor-Leste.

Asinatura memorandum entendimentu ne’e asina husi dirijentes téknikus sira husi instituisaun tolu no hetan akompañamentu husi Prezidente no Komisarius Komisaun Funsaun Públika.

Eventu ne’e realiza loron segunda feira, 31 Maiu 2021, iha edifisiu KFP, Matadouro, Dili.