Comissão da Função Pública

Komisaun Funsaun Públika hamutuk ho ekipa integradu husi PDHJ, IJE, SEII, INSS, MEJD no Diresaun Jeral Jestaun Patrimoniu Estadu-Ministériu Finansas realiza diseminasaun ba dahuluk iha tinan 2023 iha postu administrativu Laulara, munisípiu Aileu hodi partilla informasaun kona-ba kuadrus legais iha Funsaun Públika no prosedimentus sira seluk.

Iha abertura diseminasaun ne’e Administrador Postu Administrativu Laulara, Alfredo Fátima agradese ba ekipa integradu tomak tamba foin primeira vez hetan diseminasaun ida ne’e no husu ba partisipantes sira atu aproveita oportunidade ne’e, rona didiak materia sira ne’ebé orador sira partilla atu nune’e bele implementa iha ida-idak ninia instituisaun.

Sekretaria Ezekutiva SKFP, Maria da Costa Oliveira reprezenta Komisaun Funsaun Públika marka prezensa iha enkontru diseminasaun ne’e liu husi nia intervensaun hato’o ba partisipantes sira katak, nu’udar funsionárius públiku, tenke hatene nia dever obrigasaun nu’udar servidor Estadu disiplina, pontual, onestidade, obedese ba nia superior sira, rai segredu Estadu nia halo atendimentu di’ak ba povu ho humildade, kumpri regras legais ne’ebé regula funsionárius, ezerse imi nia energia uluk tuir professionalizmu ida-idak nia atende povu nia nesesidade ne’e dever funsionárius nian hafoin hetan direitu.

Sekretaria Ezekutiva ne’e husu ba funsionariu sira atu servisu ho transparensia no imparsialidade atende ema ho oin mamar, hasse’es an husi hahalok  at  hanesan korupsaun, nepotizmu, abuzu de poder no ba kualker hahalok kontra regras legais sira iha funsaun publika.

Durante diseminasaun partisipante sira levanta kestaun sira liga ho promosaun, eskalaun, seguransa sosial hanesan pensaun, idade reforma no eventualidade sira, jestaun rekursu umanus, professores kestiona ba lokalidade áreas remotas, uzu patrimoniu Estadu, kontratu iha tinan barak nia laran maibé la sai sai permanente no asuntu relasionadu sira seluk.

Hatan ba kestaun hirak ne’e Prezidente KFP kontinua encoraja funsionariu sira relasiona ho promosaun ne’ebe KFP realiza kada tinan husu atu estuda maske seidauk konkista no liga ho professor sira nian ne’e fila hikas ba MEJD ninia kompetensia hodi buka planeia ho di’ak ba necessidade rekursu umanus iha eskola sira, kabe mos ba orsamentu ministério nian hodi halo politika ida di’ak hodi responde ba kestaun sira ne’e. Alende kestaun sira seluk hanesan hatan husi ekipa integradu sira katak, baze ba lokalidade servisu sira iha área remotas nian ne’e iha dekretu lei numeru 20/2012 define ona tuir ida-idak ninia distansia lokal servisu nian ne’e mak define tuir pursentu, hanesan remotas hetan 15 pursentu inklui muito remotas no extremamente remotas hetan pursentu diferente no kestaun sira seluk ne’ebe responde husi ekipa.

Materia sira ne’ebe aprezenta husi ekipa hanesan husi KFP kona-ba direitu no deveres,  avaliasaun dezempenu, regime promosaun, etika no disiplina, pensaun, reforma no eventualidade iha Funsaun Publika, kona-ba seguransa sosial aprezenta husi INSS, matéria kona-ba utilizasaun patrimoniu Estadu aprezenta husi diretor jeral, matéria igualdade jeneru aprezenta husi pontu fokal SEII.

Antes ensera diseminasaun ne’e ekipa tekniku projeta rezultadu pre test no post test ba loron dahuluk nian rezultadu partisipantes 73% no ba loron daruak 80% no entrega mos matéria livru sira hodi sai hanesan referensia ba postu nian hodi bele asesu husi funsionariu sira.