Comissão da Função Pública

Prezidente KFP, Agostinho Letêncio de Deus no Komisariu Portefoliu Disiplinar, Agapito da Conceição ho nia ekipa ba partisipa serimónia enseramentu formasaun espesial ba Seguransa Patrimoniu Públiku nain 100 mai husi munisípiu 12 inklui RAEOA husi Diresaun Nasionál Seguransa Patrimoniu Públiku (DNSPP), Ministeriu Interior ne’ebé durante ne’e tuir formasaun fulan ida ne’ebé ensera ofisialmente husi Prezidente KFP no Ministru Interior, iha Rairobo – postu administrativu Atabae, Munisípiu Bobonaro, iha tersa-feira, (28/10/2024).

Liu husi Prezidente KFP, Agostinho Letêncio de Deus ninia alokusaun iha serimónia enseramentu formasaun ne’e informa ba formadus sira ho partisipantes ein jeral kona-ba  rekoñesimentu formasaun espesial  ne’e la’ós lori funsionarius sira ba perfeitu maibé, atu koñese nia funsoens no deveres oinsá atu proteje patrimoniu Estadu.

Prezidente KFP agradese ba planu ne’ebé Ministru Interior ho nia diresaun tamba, iha sira nia mandatu fó prioridade liu ba formasaun nu’udar programa prinsipal ba IX Governu Konstitusional, prosesu reforma Administrasaun Públika.

Komisaun Funsaun Públika diskute  bebeik kona-ba,  formasaun tamba liu husi sistema ida ne’e mak ita bele hatene ida-idak nia funsoens, oinsá halo protesaun no halo atendimentu ba públiku ho kualidade, aprende husi formasaun sira ne’e mak dezenvolve ida-idak nia karákter, muda mentalidade hamosu espíritu nasionalizmu no patriotizmu hodi serví nasaun ho onestidade, tuir exemplar libertadores sira nian, halo servisu ho efisiente no efikasia, dehan Prezidente KFP, Agostinho Letêncio de Deus.

Iha enseramentu formasaun ne’e Ministru Interior, Francisco Guterres liu husi nia diskursu, enkoraja ba graduadus sira  nain atus ida ne’ebé formadu ona katak, formasaun espesial ba primeira faze ida ne’e la’ós kotu iha ne’e maibé, sei iha kontinuasaun ba sira ne’ebé servisu iha terenu ne’ebá mós sei hetan oportunidade hanesan imi hodi fó vantajen ba promosaun kareira. Se lae sira  reforma nivel kiik liu, la fó benefisiu ba nia tamba, fó nia kontribuisaun ba nasaun durante tinan barak maibé, la dignifika sira nia direitu ho nune’e Ministériu Interior ho KFP servisu hamutuk oinsá funsionariu sira reforma ho dignu, deskansa goza nia direitu ba pensaun mós sufisiente  ba nia moris lor-loron nian.