Comissão da Função Pública

Categories: Notícias

KFP no Embaixada Malázia Diskute Kooperasaun ba Digitalizasaun Jestaun Rekursu Umanus

DÍLI – Prezidente no Komisárius Komisaun Funsaun Públika (KFP), ne’ebé akompaña husi Sekretária Ezekutiva, hala’o enkontru kortezia ho Embaixador Malázia no ajensia CIPTABase PLT hodi diskute kona-ba dezenvolvimentu sistema digitalizasaun ba jestaun rekursu umanus nian.

Enkontru ne’ebé hala’o iha kuarta-feira (08/04/2026), iha Salaun Enkontru KFP, Matadouro, iha objetivu prinsipál atu buka estratéjia hodi haforsa liután sistema digitalizasaun dadus iha nivel Funsaun Públika Timor-Leste nian.

Iha biban ne’e, ajensia CIPTABase PLT aprezenta sira-nia área espesializada iha Informasaun Teknolojia (IT) no solusaun digital; Dezenvolvimentu Software ne’ebé inovativu no Análize ba infraestrutura IT hodi apoia transformasaun digitál.

Objetivu husi aprezentasaun ne’e mak atu esplora oportunidade kooperasaun hodi hasa’e kualidade sistema Governu Eletrónika (E-Government), nune’e bele mellora efisiensia no efikasia atendimentu iha setór públiku, la’ós de’it iha nivel nasionál, maibé mós prepara an ba integrasaun iha nivel rejionál ASEAN.

Prezidente KFP hato’o apresiasaun boot ba ajensia CIPTABase PLT ne’ebé fahe ona koñesimentu no espesialidade iha área dezenvolvimentu sistema nian. No konsidera katak modernizasaun sistema mak xave prinsipál atu garantia prestasaun servisu ne’ebé lalais no kredivel.

Iha fatin hanesan, KFP mós aprezenta progresu husi Sistema SIGAP FOUN. Sistema ne’e mak rezultadu husi kreatividade no dedikasaun funsionáriu tékniku KFP nian, ne’ebé oras ne’e daudaun ekipa dezenvolvimentu baze dadus UDSIFP dezeña ona modulu ne’ebé dezenvolvidu no implementadu.

Enkontru ne’e sai hanesan pasu importante ida ba KFP hodi kontinua moderniza administrasaun públika iha Timor-Leste liuhusi teknolojia informasaun ne’ebé avansadu.