Comissão da Função Pública

Komisaun Funsaun Públika ne’ebé reprezenta husi Komisáriu ba portefóliu forsa traballu, José Telo Soares Cristovão ensera kursu indusaun jeral ba funsionárius permanente foun nain 45 kompostu husi feto 23 no mane 22, iha tersa feira, (01/04/2025), iha INAP, Comoro ne’ebé akompaña husi Diretor Jeral Instituisaun Nasional Administrasaun Públika (INAP), Policarpo Amilcar Boavida.

Indusaun jeral ne’e atu dezenvolve no fó koñesimentu jeral kona-ba lalaok servisu funsionárius rekrutadu foun 2023-2024 atu dezenvolve sira nia koñesimentu iha Administrasaun Públika baze ba dekretu lei númeru 38/2012 kona-ba formasaun no kapasitasaun funsaun públika artigu 20.

Indusaun hanesan aumenta koñesimentu ita boot sira sai funsionáriu públiku hodi hala’o servisu iha instituisaun ida-idak tuir materia ne’ebé hetan iha indusaun, dehan Komisáriu KFP.

Komisáriu José Telo Soares Cristovão lori KFP nia naran hakarak ezije ba ita boot sira wainhira fila husi fatin ne’e ba Ministériu ida-idak hodi transforma ba matenek ne’ebé durante aprende fulan ida iha indusaun no hahú implementa iha institusaun ida-idak, tanba ita boot sira deside ona tama iha área funsaun públika hodi sai servidor estadu atu serví.

Iha tempu hanesan Diretor Jeral INAP, Policarpo Amilcar Boavida hateten, formasaun indusaun ne’ebé realiza durante fulan ida iha INAP koopera ho instituisaun barak hamutuk ho KFP hodi buka kapasita no hasa’e koñesimentu resém rekrutadu sira hodi serví instituisaun ho responsabilidade.